સુરત: શહેરમાં ખાડીપૂરના કારણે સર્જાયેલી જળબંબોળ સ્થિતિ વચ્ચે એક અત્યંત દુઃખદ સમાચાર સામે આવ્યા છે. પૂરના ઓસરતા પાણીની વચ્ચે આજે ખરવાસા રોડ પરથી એક અજાણ્યા યુવકની લાશ મળી આવતા સમગ્ર પંથકમાં ચકચાર મચી ગઈ છે. પ્રાથમિક અહેવાલો મુજબ ખાડીના પ્રચંડ વહેણમાં તણાઈને અહીં આવી પહોંચી હોવાનું અનુમાન છે.

સુરત અને તેની આસપાસના વિસ્તારોમાં છેલ્લા કેટલાક દિવસોથી ખાડીપૂરના ગંદા પાણીએ ભારે તબાહી મચાવી છે પૂરના પાણી રોડ-રસ્તા અને સોસાયટીઓમાં ઘૂસી જતાં અસંખ્ય લોકો મુશ્કેલીમાં મુકાયા હતા. આ ભયાનક આપત્તિ વચ્ચે, સુરતના ખરવાસા રોડ પરથી એક અજાણ્યા યુવકનો મૃતદેહ મળી આવતાં સ્થાનિક રહેવાસીઓ સ્તબ્ધ થઈ ગયા છે 

સ્થાનિક નાગરિકોએ રસ્તા પર પૂરના પાણીની વચ્ચે મૃતદેહ તરતો જોતાં જ તાત્કાલિક ધોરણે સ્થાનિક પોલીસ મથક અને ફાયર બ્રિગેડને આ અંગે જાણ કરી હતી. ઘટનાની ગંભીરતાને સમજીને સુરત ફાયર વિભાગની ટીમ તુરંત જ ઘટનાસ્થળે દોડી ગઈ હતી અને ભારે જહેમત બાદ પાણીના પ્રવાહમાંથી મૃતદેહને બહાર કાઢી રેસ્ક્યુ ઓપરેશન પૂર્ણ કર્યું હતું  ત્યારબાદ, કાયદેસરની કાર્યવાહી હાથ ધરી મૃતદેહને પોસ્ટમોર્ટમ અર્થે સુરતની સ્મીમેર હોસ્પિટલમાં મોકલી આપવામાં આવ્યો છે.

ચોંકાવનારી બાબત એ છે કે સુરતના આ જ ખરવાસા રોડ વિસ્તારમાંથી વહેલી સવારે પણ અન્ય બે અજાણ્યા વ્યક્તિઓના મૃતદેહ મળી આવ્યા હતા. આમ, એક જ દિવસમાં અને એક જ ચોક્કસ વિસ્તારમાંથી કુલ ત્રણ લાશ મળી આવતા સ્થાનિક વહીવટી તંત્ર અને પોલીસ વિભાગ એક્શન મોડમાં આવી ગયા છે. પ્રાથમિક દ્રષ્ટિએ આ તમામના મોત ખાડીપૂરના ભારે પ્રવાહમાં નિયંત્રણ ગુમાવવા અથવા તણાઈ જવાના કારણે શ્વાસ રૂંધાવાથી થયા હોવાનું તબીબી અને સરકારી સૂત્રો જણાવી રહ્યા છે.

પૂરના ઓસરતા પાણીની સાથે આવી રીતે મૃતદેહો મળી આવવાની આ ઘટનાથી પૂર પ્રભાવિત વિસ્તારોના લોકોમાં ભારે ભયનો માહોલ જોવા મળી રહ્યો છે. સ્થાનિક સેવાભાવી સંસ્થાઓ અને વહીવટી તંત્ર હાલ પૂરગ્રસ્ત વિસ્તારોમાં કોઈ અન્ય વ્યક્તિ લાપતા છે કે કેમ તેની વિગતો એકત્રિત કરી રહી છે, જેથી પૂરના કારણે થયેલી જાનહાનિનો સાચો આંકડો જાણી શકાય.

આ સમગ્ર મામલે સુરત સિટી પોલીસે ગુનો નોંધીને આગળની કાયદાકીય તપાસ હાથ ધરી દીધી છે સ્મીમેર હોસ્પિટલના પીએમ રિપોર્ટ આવ્યા બાદ જ મોતના ચોક્કસ અને વાસ્તવિક કારણો સત્તાવાર રીતે બહાર આવશે. હાલમાં, આ અજાણ્યા યુવકની ઉંમર અને તેની ઓળખ સ્થાપિત કરવા માટે પોલીસે આસપાસના પોલીસ સ્ટેશનોમાં નોંધાયેલી ગુમશુદા વ્યક્તિઓની યાદી તપાસવાનું શરૂ કર્યું છે.

સુરત મ્યુનિસિપલ કોર્પોરેશન અને પોલીસ વિભાગે પૂર પ્રભાવિત વિસ્તારોમાં રહેતા લોકોને ખાસ અપીલ કરી છે કે, ખાડીપૂરના પાણી ભલે ઓસરી રહ્યા હોય, પરંતુ હજુ પણ રોડ પરના ખાડા કે વહેતા પાણીની નજીક જવાનું ટાળવું. કોઈપણ અકસ્માત કે અજાણ્યા પદાર્થ અથવા લાશ દેખાય તો તુરંત જ કંટ્રોલ રૂમને જાણ કરવા જણાવાયું છે.