સાણંદ (અમદાવાદ): અમદાવાદના સાણંદ તાલુકાના મોરૈયા ગામમાં આજે સાંજે જાહેરમાં થયેલા હિંસક ટકરાવે સમગ્ર પંથકમાં ભયનો માહોલ પેદા કરી દીધો છે. ગ્રામ પંચાયત કચેરીની સામે જ બે જૂથો એકબીજા સાથે લોહીયાળ જંગમાં ઉતરી આવ્યા હતા. આ ઘટનામાં તીક્ષ્ણ હથિયારો અને લાકડીઓનો બેફામ ઉપયોગ થતા નાસભાગ મચી ગઈ હતી, જેના દ્રશ્યો સીસીટીવી કેમેરામાં કેદ થતા હવે તે સોશિયલ મીડિયા પર વાયરલ થઈ રહ્યા છે.

સરપંચનો પરિવાર પણ હુમલાની ઝપેટમાં

આ અથડામણ અત્યંત ગંભીર રહી હતી, જેમાં મોરૈયા ગ્રામ પંચાયતના સરપંચ જયશ્રીબેન દાયમાના પતિ ભીખાભાઈ દાયમા અને તેમના પુત્ર મયુરસિંહ દાયમા પર પણ જીવલેણ હુમલો કરવામાં આવ્યો હતો. આ હુમલામાં સરપંચના પતિ અને પુત્ર ગંભીર રીતે ઈજાગ્રસ્ત થયા છે. હુમલાખોરોની ઉગ્રતા એટલી બધી હતી કે જાણે કાયદાનો કોઈ ડર જ ન હોય તે રીતે હથિયારો વીંઝવામાં આવ્યા હતા.

શું હતું કારણ?

પ્રાથમિક તપાસમાં બહાર આવ્યું છે કે આ અથડામણનું મુખ્ય કારણ દોઢ વર્ષ જૂની નાણાકીય લેવડ-દેવડનો વિવાદ છે. બંને જૂથો વચ્ચે લાંબા સમયથી મનદુઃખ ચાલતું હતું, જે આજે અચાનક વિસ્ફોટક સ્વરૂપ ધારણ કરી ગયું અને જાહેર રસ્તા પર લોહીયાળ અથડામણમાં પરિણમ્યું હતું.

પોલીસ કાર્યવાહી અને તપાસ

ઘટનાની જાણ થતા જ ચાંગોદર પોલીસ સ્ટેશનનો કાફલો તાત્કાલિક ઘટનાસ્થળે દોડી આવ્યો હતો. ઈજાગ્રસ્તોને સારવાર અર્થે નજીકની હોસ્પિટલમાં ખસેડવામાં આવ્યા છે. પોલીસે સીસીટીવી ફૂટેજ કબજે કરીને સમગ્ર મામલાની તપાસ માટે એફએસએલ (FSL) ની મદદ લીધી છે. હાલમાં ગામમાં શાંતિ જળવાઈ રહે તે માટે ચુસ્ત પોલીસ બંદોબસ્ત ગોઠવી દેવામાં આવ્યો છે અને કાયદેસરની કાર્યવાહી હાથ ધરવામાં આવી છે.