મહેસાણા જિલ્લામાં સ્થાનિક સ્વરાજ્યની ચૂંટણીના પરિણામોમાં ભારતીય જનતા પાર્ટીએ પ્રચંડ વિજય હાંસલ કરીને વિરોધ પક્ષના સૂપડા સાફ કરી દીધા છે. ખાસ કરીને કડી તાલુકા પંચાયતની 30 બેઠકોમાંથી 24 બેઠકો પર ભગવો લહેરાવી ભાજપે સત્તા કબજે કરી છે, જ્યારે જિલ્લા પંચાયતની તમામ 7 બેઠકો પર પણ ભાજપના ઉમેદવારો વિજેતા થયા છે. આ ચૂંટણીમાં સૌથી મોટો ઉલટફેર કોંગ્રેસ પ્રમુખના વતનમાં જોવા મળ્યો હતો, જ્યાં તેમના પોતાના જ ગઢમાં ભાજપે જીત મેળવી છે અને ઝાલસોડા બેઠક પર ભવ્ય બાજી મારી છે. કડીમાં સ્થિતિ એવી સર્જાઈ હતી કે કોંગ્રેસના 2 ઉમેદવારોની ડિપોઝીટ પણ ડૂલ થઈ ગઈ હતી. આ ઉપરાંત, કડી નગરપાલિકામાં ભાજપની 28 બેઠકો પર બિનહરીફ જીત થઈ છે. આ ઐતિહાસિક સફળતા બાદ પૂર્વ નાયબ મુખ્યમંત્રી નીતિનભાઈ પટેલે ભાજપ પર અતૂટ વિશ્વાસ મૂકવા બદલ તમામ મતદારોનો હૃદયપૂર્વક આભાર માન્યો હતો.