સુરત : સુરતના હીરા ઉદ્યોગમાં રોકાણના બહાને છેતરપિંડીની ઘટનાઓ અવારનવાર સામે આવતી હોય છે, પરંતુ આ વખતે લેબગ્રોન ડાયમંડ મશીનરીના નામે એક વેપારી સાથે 3.50 કરોડ રૂપિયાનું અધધ ફુલેકુ ફેરવવાનો ચોંકાવનારો કિસ્સો પ્રકાશમાં આવ્યો છે. અડાજણ વિસ્તારના એક વેપારીને ઊંચા વળતરની લાલચ આપીને વિશ્વાસમાં લેનાર બે આરોપીઓને આખરે સુરત પોલીસના ઇકો સેલે જેલના સળિયા પાછળ ધકેલી દીધા છે.
શું હતું આ આખું કૌભાંડ?
વર્ષ 2021 માં કેતન ભીખાલાલ પટેલ નામના વેપારીનો સંપર્ક સંદીપ જસાણી સાથે થયો હતો. આરોપીઓએ વેદ રોડ સ્થિત 'એશિયન લેબગ્રોન ડાયમંડ એલએલપી'ના ભાગીદાર તરીકે ખોટી ઓળખ આપી હતી અને વેપારીને ખાતરી આપી હતી કે જો તેઓ લેબગ્રોન ડાયમંડ મશીનરીમાં રોકાણ કરશે તો તેમને મોટો ફાયદો થશે. કેતનભાઈએ આ લાલચમાં આવીને અમેરિકામાં વસતા પોતાના પરિવારજનો પાસેથી નાણાં મંગાવીને 3.50 કરોડનું જંગી રોકાણ કર્યું હતું. જોકે, થોડા સમય બાદ આરોપીઓએ હીરાનું ઉત્પાદન બંધ કરી દીધું અને વેપારીના પૈસા પરત આપવાનું નામ જ ન લીધું.
પોલીસની કડક કાર્યવાહી
આ મામલે સુરત પોલીસ કમિશનરને ફરિયાદ મળતા જ તપાસનો દોર ઇકો સેલને સોંપવામાં આવ્યો હતો. આ કેસમાં પોલીસની સઘન તપાસ બાદ અંકુશ નાકરાણી અને સંદીપ જસાણી નામના બે મુખ્ય આરોપીઓની ધરપકડ કરવામાં આવી છે. રિમાન્ડ દરમિયાન પૂછપરછમાં જાણવા મળ્યું છે કે અંકુશ નાકરાણી અગાઉ પણ અન્ય વેપારીઓ સાથે છેતરપિંડી કરવાના ગુનામાં સંડોવાયેલો છે અને તેની વિરુદ્ધ સીઆઈડી ક્રાઈમમાં પણ ફરિયાદ નોંધાયેલી છે.
જેલના સળિયા પાછળ આરોપીઓ
પોલીસે બંને આરોપીઓના રિમાન્ડ મેળવીને આ કૌભાંડના મૂળ સુધી પહોંચવા પ્રયાસ કર્યો હતો. રિમાન્ડ પૂર્ણ થતાં બંને આરોપીઓને જ્યુડિશિયલ કસ્ટડી હેઠળ જેલમાં મોકલી આપવામાં આવ્યા છે. સુરતના લેબગ્રોન ડાયમંડ ઉદ્યોગમાં ચાલતા આ પ્રકારના મોટા કૌભાંડોને લઈને વેપારી વર્ગમાં ફફડાટ વ્યાપી ગયો છે અને પોલીસની આ કાર્યવાહીથી છેતરપિંડી કરનારાઓમાં ફફડાટ ફેલાયો છે.