અમદાવાદ : સાળંગપુર કષ્ટભંજન દેવના દર્શન કરી હૃદયમાં પવિત્ર આસ્થા સાથે વતન તરફ પરત ફરી રહેલા વિજાપુરના એક હસતા-રમતા પરિવારની ખુશીઓ પળવારમાં માતમમાં ફેરવાઈ ગઈ છે. બાવળા-અમદાવાદ મુખ્ય માર્ગ પર આવેલા મોરૈયા બ્રિજ પર સર્જાયેલી એક ભયાનક અને કાળમુખી દુર્ઘટનામાં કારમાં સવાર બે શ્રદ્ધાળુઓના ઘટનાસ્થળે જ કમકમાટીભર્યા મોત નીપજ્યા છે. હાઈવે પર કન્ટેનર અને કાર વચ્ચે થયેલી આ પ્રચંડ ટક્કરને પગલે લોહીલુહાણ ચીસાચીસ મચી ગઈ હતી, જેના કારણે પોલીસ કાફલો અને રાહદારીઓ તાત્કાલિક બચાવ કામગીરી માટે ઘટનાસ્થળે દોડી ગયા હતા. અકસ્માત એટલો પ્રચંડ હતો કે પળવારમાં આખી કાર લોખંડના કૂચડામાં તબદીલ થઈ ગઈ હતી.

પ્રચંડ ટક્કરથી કારનો લોખંડી કૂચડો બોલી ગયો:

મળતી સત્તાવાર વિગતો મુજબ, એક પૂરપાટ ઝડપે આવી રહેલું ભારે ભરખમ કન્ટેનર બાવળાથી સરખેજ તરફ જઈ રહ્યું હતું. આ દરમિયાન મોરૈયા બ્રિજ પર કન્ટેનરના ચાલકે અચાનક સ્ટેયરિંગ પરથી કાબૂ ગુમાવી દીધો હતો, જેના કારણે કન્ટેનર ત્યાંથી પસાર થઈ રહેલી એક સ્વિફ્ટ કાર સાથે જોરદાર ભટકાયું હતું. બંને વાહનો વચ્ચેની આ ટક્કર એટલી પ્રચંડ અને ભયાનક હતી કે સ્વિફ્ટ કારનો પળવારમાં કચ્ચરઘાણ વળી ગયો હતો અને હાઈવે પર મુસાફરોની મરણચીસો ગુંજી ઉઠી હતી.

પરિવાર હનુમાનજીના દર્શન કરી વિજાપુર જિય રહ્યો હતો:

આ કમનસીબ સ્વિફ્ટ કારમાં કુલ પાંચ વ્યક્તિઓ સવાર હતા. આ તમામ લોકો સાળંગપુર હનુમાનજીના દર્શન કરીને વિજાપુર તરફ જઈ રહ્યા હતા. અકસ્માતની તીવ્રતા એટલી વધારે હતી કે કારમાં સવાર પાંચ લોકોમાંથી બે વ્યક્તિઓના ઘટનાસ્થળે જ કમકમાટીભર્યા મોત નીપજ્યા હતા. મૃતકોમાં એક મહિલા અને એક પુરુષનો સમાવેશ થાય છે. આ હૃદયદ્રાવક ઘટનાને પગલે હાઈવે પરથી પસાર થતા સ્થાનિક લોકો અને અન્ય રાહદારીઓના ટોળેટોળા ઉમટી પડ્યા હતા અને પોલીસ આવે તે પહેલાં જ માનવતાના ધોરણે તુરંત બચાવ કામગીરી શરૂ કરવામાં આવી હતી.

ઇજાગ્રસ્તોની સ્થિતિ નાજુક, કન્ટેનર ચાલક સામે ગુનો દાખલ:

દુર્ઘટનાની જાણ થતાં જ સ્થાનિક પોલીસ કાફલો અને એમ્બ્યુલન્સની ટીમ તાત્કાલિક ઘટનાસ્થળે દોડી આવી હતી. કારના પતરા તોડીને અંદર ફસાયેલા અન્ય ત્રણ ઇજાગ્રસ્તોને ભારે જહેમત બાદ બહાર કાઢવામાં આવ્યા હતા. આ ત્રણેય ઇજાગ્રસ્તોની શારીરિક સ્થિતિ અત્યંત ગંભીર હોવાથી તેમને વધુ તાત્કાલિક સારવાર અર્થે અમદાવાદની પ્રખ્યાત શાલબી હોસ્પિટલ ખાતે ખસેડવામાં આવ્યા છે, જ્યાં હાલમાં સીનિયર ડોક્ટરોની ટીમ દ્વારા તેમને સઘન સારવાર આપવામાં આવી રહી છે. પોલીસે આ મામલે સત્તાવાર ગુનો નોંધીને અકસ્માત સર્જી ફરાર થયેલા કન્ટેનર ચાલક સામે કાયદેસરની આકરી કાર્યવાહી હાથ ધરી છે અને અકસ્માતનું ચોક્કસ ટેકનિકલ કારણ જાણવા માટે વધુ તપાસ શરૂ કરી છે. પવિત્ર યાત્રાધામથી પરત ફરતી વખતે સર્જાયેલી આ કાળમુખી દુર્ઘટનાથી મૃતકોના વતન વિજાપુર પંથકમાં ભારે અરેરાટી અને શોકનું મોજું ફરી વળ્યું છે.