વલસાડ : રાજ્યના પ્રવક્તા મંત્રી જીતુભાઈ વાઘાણીએ વલસાડ ખાતેથી એક મહત્ત્વપૂર્ણ જાહેરાત કરતાં જણાવ્યું છે કે, તાજેતરમાં ભારે વરસાદ અને પૂરના કારણે વલસાડ તેમજ નવસારી જિલ્લામાં નુકસાન પામેલા નાના-મોટા વેપારીઓ, લારી-ગલ્લા ધારકો અને દુકાનદારો માટે રાજ્ય સરકાર દ્વારા આર્થિક પુનઃવસન સહાય આપવામાં આવશે. અમદાવાદ અને સુરત શહેરોમાં અપાયેલી સહાયની તર્જ પર જ આ બંને જિલ્લાના અસરગ્રસ્તોને મદદ પૂરી પાડવામાં આવશે.

આ ઉપરાંત, મંત્રીએ ઉમેર્યું હતું કે પૂરના કારણે ખેતીવાડી અને બાગાયતી પાકોને થયેલા વ્યાપક નુકસાનનો તાત્કાલિક ધોરણે સર્વે હાથ ધરવા માટે મુખ્યમંત્રી દ્વારા સ્પષ્ટ સૂચનાઓ આપી દેવામાં આવી છે. આ સર્વેની કામગીરી પૂર્ણ થયા બાદ કેન્દ્ર અને રાજ્ય સરકારના નિયત ધારા-ધોરણો મુજબ ખેડૂતો માટે વિગતવાર સહાય પેકેજની જાહેરાત કરવામાં આવશે. પ્રવક્તા મંત્રી જીતુભાઈ વાઘાણીએ ખાતરી આપી હતી કે આવી વિકટ પરિસ્થિતિમાં દરેક તબક્કે રાજ્ય સરકાર નાગરિકોની સાથે ખડેપગે રહીને તમામ શક્ય સહાય પૂરી પાડશે.

આગામી બે દિવસ દરમિયાન હજુ પણ રેડ અને ઓરેન્જ એલર્ટની આગાહી હોવાથી વહીવટી તંત્ર દ્વારા જારી કરવામાં આવતી તમામ સૂચનાઓનું ચુસ્તપાલન કરવા નાગરિકોને અનુરોધ કરવામાં આવ્યો છે. આ કપરા સમયમાં અસરગ્રસ્તોની વ્હારે આવેલી સ્વૈચ્છિક સંસ્થાઓ, દિવસ-રાત જોયા વગર કામગીરી કરી રહેલા વહીવટી તંત્ર અને સહયોગ આપનાર સ્થાનિક નાગરિકોની કામગીરીને મંત્રીએ બિરદાવી હતી.