અમદાવાદ :કેન્દ્રીય ગૃહ અને સહકાર મંત્રી અમિતભાઈ શાહ આજથી, 16 મે થી ગુજરાતના બે દિવસીય પ્રવાસે છે. આ મુલાકાત દરમિયાન તેઓ અમદાવાદ અને ગાંધીનગરમાં શ્રેણીબદ્ધ સત્તાવાર કાર્યક્રમોમાં ભાગ લેશે. આ પ્રવાસનો મુખ્ય ઉદ્દેશ્ય પ્રદેશમાં ચાલી રહેલા વિકાસ પ્રોજેક્ટ્સની સમીક્ષા કરવાનો અને ડેરી ક્ષેત્રને નવી ઊંચાઈઓ પર લઈ જવાનો છે.

અમિતભાઈ  શાહે આ પ્રવાસમાં પર્યાવરણ અને સંસાધનોના સંરક્ષણ માટે એક અનુકરણીય ઉદાહરણ પૂરું પાડ્યું છે. તેમણે પક્ષના કાર્યકર્તાઓને કડક સૂચના આપી છે કે, તેમને લેવા માટે કોઈએ એરપોર્ટ પર આવવાની જરૂર નથી. આ નિર્ણય પાછળનો હેતુ પેટ્રોલ અને ડીઝલનો થતો ખોટો વ્યય અટકાવવાનો છે. આ જ કારણે માત્ર ગણતરીના લોકો જ તેમને રિસીવ કરવા એરપોર્ટ પહોંચ્યા હતા. વધુમાં, ઈંધણની બચત થાય તે હેતુથી અમિતભાઈ શાહ તેમની તમામ મહત્વની બેઠકો અમદાવાદ મ્યુનિસિપલ કોર્પોરેશન (AMC) ના દક્ષિણ પશ્ચિમ ઝોનની કચેરી ખાતે જ યોજશે, જેથી વારંવારની અવરજવર ટાળી શકાય

શનિવારે યોજાનારી ઉચ્ચ સ્તરીય બેઠકમાં સિનિયર મ્યુ. અધિકારીઓ અને નવા ચૂંટાયેલા કોર્પોરેટરો સાથે અમિત શાહ સીધો સંવાદ કરશે. આ બેઠકમાં ગાંધીનગર લોકસભા મતવિસ્તાર હેઠળ આવતા કરોડો રૂપિયાના નાગરિક અને માળખાગત પ્રોજેક્ટ્સની સમીક્ષા કરવામાં આવશે.

ખાસ કરીને શહેરી માળખાગત વિકાસ, તળાવોને એકબીજા સાથે જોડવાના પ્રોજેક્ટ્સ અને આગામી ચોમાસામાં પર્યાવરણની જાળવણી માટેના 'મિશન 5 મિલિયન વૃક્ષો' અભિયાનની તૈયારીઓ પર વિસ્તૃત ચર્ચા થવાની શક્યતા છે.

પ્રવાસના બીજા દિવસે, એટલે કે 17 મે ના રોજ, અમિત શાહ ગાંધીનગર જિલ્લાના ચિલોડા પાસે આવેલા દશેલા ગામે નવનિર્મિત મિલ્ક પ્રોસેસિંગ પ્લાન્ટનું ઉદ્ઘાટન કરશે. ગાંધીનગર જિલ્લા દૂધ ઉત્પાદક સહકારી મંડળી (મધુર ડેરી) દ્વારા સ્થાપિત આ આધુનિક પ્લાન્ટથી પ્રદેશમાં ડેરી પ્રોસેસિંગની ક્ષમતામાં નોંધપાત્ર વધારો થશે. બપોરે 1:00 વાગ્યે યોજાનારા આ કાર્યક્રમમાં તેઓ પ્લાન્ટનું નિરીક્ષણ કર્યા બાદ એક જાહેર સભાને પણ સંબોધિત કરશે. આ પ્રોજેક્ટથી સહકારી નેટવર્ક સાથે જોડાયેલા હજારો સ્થાનિક દૂધ ઉત્પાદકોને મોટો આર્થિક લાભ થવાની અપેક્ષા છે