ગાંધીનગર, : ગુજરાત પોલીસ ભરતી બોર્ડ દ્વારા લોકરક્ષક કેડરની ૧૨,૭૩૩ જગ્યાઓ માટે આજે યોજાનારી મેગા લેખિત પરીક્ષામાં શારીરિક કસોટી પાસ કરનારા ૨,૬૩,૩ canvas ઉમેદવારો ભાગ લઈ રહ્યા છે, જેને સંપૂર્ણ નકલરહિત અને પારદર્શક બનાવવા માટે ગૃહ વિભાગ દ્વારા આર્ટિફિશિયલ ઇન્ટેલિજન્સ (AI) અને ચુસ્ત વહીવટી સુરક્ષા વ્યવસ્થા ગોઠવવામાં આવી છે.

ભરતી પ્રક્રિયાને ગેરરીતિ મુક્ત અને પારદર્શક બનાવવા માટે વહીવટી તંત્ર, શિક્ષણ વિભાગ અને પોલીસ વિભાગ સજ્જ બન્યું છે. પરીક્ષામાં 17 હજારથી વધુ શિક્ષણનો સ્ટાફ હાલ પરીક્ષામાં ખડેપગે છે. જ્યારે 9 હજાર પોલીસ કમીઓ અને અધિકારીઓ તૈનાત છે. દરેક પરિક્ષા કેન્દ્ર પર ભરતી બોર્ડના વિશેષ પ્રતિનિધિ તરીકે પીએસઆઈ અને પીઆઈ રુબરુ મોનિટરિંગ કરી રહ્યા છે.

ચુસ્ત એન્ટ્રી પ્રોસેસ: સવારે 7:30 વાગ્યાથી ઉમેદવારોનું કડક ફ્રિસ્કિંગ (ચેકિંગ), થમ્બ ઇમ્પ્રેશન અને ફોટો મેચ કરીને જ પ્રવેશ આપવામાં આવ્યો. AI અને ફેસિયલ રેકોગ્નિશન: કોઈ ડમી ઉમેદવાર પરીક્ષામાં ન બેસી જાય તે માટે આર્ટિફિશિયલ ઇન્ટેલિજન્સ (AI) અને ચહેરો ઓળખતી સિસ્ટમનો ઉપયોગ કરાયો છે. GPS ટ્રેકિંગ: પ્રશ્નપત્રો અને પરીક્ષા સામગ્રી લાવવા-લઇ જવા માટે વપરાતા તમામ લોજિસ્ટિક વાહનોનું જીપીએસ (GPS) મારફતે રિયલ ટાઈમ મોનિટરિંગ થઈ રહ્યું છે. પરીક્ષા કેન્દ્રો પર હાજર ઉમેદવારોને જો કોઈ અચાનક તકલીફ પડે, તો તેની સારવાર માટે ખાસ મેડિકલ સ્ટાફ અને વ્યવસ્થા પણ ગોઠવવામાં આવી છે.

રાજ્યમાં અગાઉની સરકારી ભરતી પરીક્ષાઓમાં પેપર લીક અને ડમી ઉમેદવારોના કૌભાંડો સામે આવ્યા બાદ સરકાર માટે આ પરીક્ષા પ્રતિષ્ઠાનો સવાલ બની છે. આ હાઈટેક નવતર પ્રયોગના સફળ અમલીકરણ બાદ, હવે પછી લેવાનારી રાજ્ય સરકારની તમામ ક્લાસ-૩ અને અન્ય વહીવટી સંવર્ગની સ્પર્ધાત્મક પરીક્ષાઓમાં પણ આ જ પ્રકારે ફેસિયલ રેકોગ્નિશન અને લાઈવ એઆઈ ટ્રેકિંગ મોડ્યુલ ફરજિયાતપણે લાગુ કરવાની દિશામાં ભરતી બોર્ડ આગળ વધી રહ્યું છે.