અંબાજી : ગુજરાતી નૂતન વર્ષના પવિત્ર અવસરે બનાસકાંઠા જિલ્લાના પ્રસિદ્ધ યાત્રાધામ અંબાજી ખાતે અમદાવાદના રાજકીય આગેવાનોની વિશેષ હાજરી જોવા મળી હતી. અમદાવાદના મેયર હિતેશભાઈ બારોટ સહિત શહેરના ધારાસભ્યો નવા વર્ષની શરૂઆતમાં જ માં અંબાના આશીર્વાદ મેળવવા અંબાજી ધામ પહોંચ્યા હતા. બેસતા વર્ષના આ ખાસ દિવસે શિર ઝુકાવીને તમામ આગેવાનોએ ધાર્મિક આસ્થા સાથે નવા વર્ષના મંગલ પ્રારંભ કર્યા હતા.

આ ધાર્મિક પ્રસંગે અમદાવાદના મેયર હિતેશભાઈ બારોટ, ધારાસભ્ય કૌશિકભાઈ જૈન અને ધારાસભ્ય અમિતભાઈ શાહે મંદિરમાં ઉપસ્થિત રહી માં અંબાના દર્શન કર્યા હતા. આ તમામ નેતાઓએ અંબાજી મંદિરમાં યોજાયેલી પવિત્ર આરતીમાં ભાગ લીધો હતો અને ભક્તિભાવપૂર્વક પૂજા-અર્ચના કરીને સમગ્ર રાજ્યની સુખ-શાંતિ માટે પ્રાર્થના કરી હતી. બેસતા વર્ષના પ્રથમ દિવસે જ મંદિરમાં દર્શનનું વિશેષ મહત્ત્વ હોવાથી નેતાઓની હાજરી આકર્ષણનું કેન્દ્ર બની હતી.

ઉલ્લેખનીય છે કે અમદાવાદના આ રાજકીય આગેવાનો વર્ષોથી બેસતા વર્ષના દિવસે અંબાજી પહોંચીને માતાજીના દર્શન કરવાની પોતાની વર્ષો જૂની પરંપરા જાળવી રહ્યા છે. ગુજરાતમાં નૂતન વર્ષની શરૂઆત ભગવાનના આશીર્વાદ સાથે કરવાની પ્રાચીન સંસ્કૃતિ રહી છે, અને આ વર્ષે પણ નેતાઓએ તે પરંપરાને યથાવત રાખી હતી.

બેસતા વર્ષે અંબાજી ખાતે દર્શન કર્યા બાદ તમામ આગેવાનોએ સ્થાનિક મંદિર ટ્રસ્ટ અને પ્રશાસન દ્વારા યાત્રાળુઓ માટે કરવામાં આવેલી વ્યવસ્થાઓની પણ સમીક્ષા કરી હતી. આગામી દિવસોમાં તહેવારો અને રજાઓને ધ્યાનમાં રાખીને અંબાજી ધામમાં શ્રદ્ધાળુઓનો ભારે ઘોડાપૂર ઉમટવાની શક્યતા છે, જેને પગલે મંદિર ટ્રસ્ટ દ્વારા દર્શન અને સુરક્ષા માટેના વધારાના સુચારૂ આયોજનો હાથ ધરવામાં આવી રહ્યા છે.