અમદાવાદ, તા. ૭ : ભાડાવધારો, યોગ્ય વળતર અને ઓનલાઈન પરિવહન કંપનીઓની નીતિના વિરોધમાં અમદાવાદના રિક્ષા અને ટેક્સી સંગઠનોએ આજથી તા. ૧૦ સપ્ટેમ્બર સુધી ચાર દિવસની હડતાળ શરૂ કરી છે. બાર જેટલાં સંગઠનોએ ‘રોજગાર બચાવો’ આંદોલન હેઠળ હડતાળનું એલાન આપ્યું છે.

ચાલકોનો આક્ષેપ છે કે ઓનલાઈન કંપનીઓ મુસાફરો પાસેથી વસૂલાતા ભાડાની સરખામણીએ વાહનચાલકોને પૂરતું વળતર આપતી નથી. ઈંધણ, જાળવણી, વીમા અને હપ્તાનો ખર્ચ વધ્યો હોવા છતાં તેમની આવક ઘટી રહી છે. ખાનગી બાઇકનો મુસાફરો માટે ગેરકાયદે ઉપયોગ બંધ કરાવવાની માગ પણ કરવામાં આવી છે.

સંગઠનો સરકાર દ્વારા પ્રતિ કિલોમીટર અને પ્રતિ મિનિટના ધોરણે ભાડું નક્કી કરાવવા તથા ઓનલાઈન કંપનીઓને તેના અમલ માટે બાધ્ય કરવાની માગ કરી રહ્યા છે. હડતાળને કારણે રેલવે સ્ટેશન, બસમથક, હવાઈમથક અને હોસ્પિટલ તરફ જતા મુસાફરોને મુશ્કેલી પડી શકે છે. માગણીઓ નહીં સ્વીકારાય તો આંદોલન રાજ્યવ્યાપી બનાવવાની ચેતવણી અપાઈ છે.