અમદાવાદ, તા.૨૯: ગયા વર્ષે ૧૨ જૂને અમદાવાદ એરપોર્ટ નજીક બનેલી દેશની સૌથી ભયંકર ઉડ્ડયન દુર્ઘટનાઓ પૈકીની એક એવા એર ઈન્ડિયાના બોઈંગ ૭૮૭ ડ્રીમલાઈનર (AI-171) વિમાન અકસ્માત અંગે કેન્દ્ર સરકારે આજે સંસદમાં અત્યંત મહત્ત્વનો વિગતવાર ખુલાસો કર્યો છે. રાજ્યસભામાં પ્રશ્નોના જવાબ આપતા નાગરિક ઉડ્ડયન રાજ્યમંત્રી મુરલીધર મોહોલે જણાવ્યું હતું કે, તપાસકર્તાઓને પ્લેનના ફ્યુઅલ કંટ્રોલ સ્વિચ લોકિંગ મિકેનિઝમમાં કોઈપણ પ્રકારની યાંત્રિક ખામી કે અસામાન્યતા જોવા મળી નથી. ઉલ્લેખનીય છે કે આ કરુણ દુર્ઘટનામાં કુલ ૨૬૦ લોકોએ પોતાના જીવ ગુમાવ્યા હતા.

અમેરિકાની સુવિધામાં મોડ્યુલની ઊંડાણપૂર્વક ચકાસણી:

સરકારે સ્પષ્ટતા કરી હતી કે વિમાનના ફ્યુઅલ કંટ્રોલ સ્વિચ અને તેના લોકિંગ ડિટેન્ટ્સની માળખાકીય અખંડિતતાનું અત્યાધુનિક પરીક્ષણ પૂર્ણ થઈ ગયું છે અને તે સંપૂર્ણપણે યોગ્ય જણાયું છે. જોકે, સીએટલ (અમેરિકા) સ્થિત ઓરિજિનલ ઈક્વિપમેન્ટ મેન્યુફેક્ચરર્સ (OEM) ની સુવિધા ખાતે વિમાનના સમગ્ર 'થ્રસ્ટ કંટ્રોલ મોડ્યુલ' ની ઊંડાણપૂર્વક તપાસ હાલમાં પણ ચાલી રહી છે. આ વર્ષના પ્રારંભમાં DGCA દ્વારા આપવામાં આવેલા નિર્દેશો મુજબ સુરક્ષા અને ઉડ્ડયન યોગ્યતાની ચકાસણી કરવામાં આવી રહી છે.

તપાસ રિપોર્ટમાં કોઈ વિલંબ નથી થયો:

એરક્રાફ્ટ એક્સિડેન્ટ ઈન્વેસ્ટિગેશન બ્યુરો (AAIB) ના અંતિમ અહેવાલમાં વિલંબ થઈ રહ્યો હોવાના વિપક્ષી દાવાઓને મંત્રીએ ફગાવી દીધા હતા. તેમણે સ્પષ્ટ કર્યું કે:

"આવી મોટી વિમાન દુર્ઘટનાઓની તપાસ કોઈ નિશ્ચિત સમયમર્યાદામાં બાંધી શકાતી નથી, કારણ કે નવા પુરાવાઓ સામે આવતા તપાસનો વ્યાપ બદલાય છે. AI-171 દુર્ઘટનાની તપાસ હાલમાં તેના આખરી તબક્કામાં છે અને સ્થાપિત આંતરરાષ્ટ્રીય પ્રક્રિયાઓ મુજબ તમામ સંભવિત કારણોની ઝીણવટભરી તપાસ થઈ રહી છે."

અંતિમ અહેવાલ સત્તાવાર વેબસાઈટ પર જાહેર થશે:

કેન્દ્ર સરકારે દેશવાસીઓને ખાતરી આપી છે કે તપાસ પ્રક્રિયા પૂર્ણ થતાં જ અકસ્માત તરફ દોરી ગયેલા તમામ પરિબળો અને તારણો ધરાવતો સંપૂર્ણ આખરી અહેવાલ જાહેર કરવામાં આવશે. આ રિપોર્ટ AAIB ની સત્તાવાર વેબસાઈટ પર તમામ માટે અપલોડ કરવામાં આવશે, જેથી સમગ્ર ઘટના પાછળના સાચા કારણો પારદર્શક રીતે દેશ સામે આવી શકે.