અમદાવાદ: ગુજરાતમાં સ્થાનિક સ્વરાજ્યની ચૂંટણીઓનો જંગ જામ્યો છે ત્યારે રાજકીય ગરમાવો તેની ચરમસીમાએ પહોંચ્યો છે. ફોર્મ પરત ખેંચવાની અંતિમ પ્રક્રિયા પૂર્વે જ કોંગ્રેસ દ્વારા પોતાના ઉમેદવારોને સાચવવા માટે 'રિસોર્ટ પોલિટિક્સ'નો સહારો લેવામાં આવ્યો છે. રાજ્યના વિવિધ જિલ્લાઓ અને નગરપાલિકાઓના ઉમેદવારોને રાતોરાત અજ્ઞાત સ્થળે ખસેડવામાં આવતા રાજકારણમાં મોટી હલચલ મચી ગઈ છે.

ચૂંટણી પહેલા ઉમેદવારો તૂટવાનો ડર કોંગ્રેસ હાઈકમાન્ડ ને  સતાવી રહ્યો છે. આથી, પક્ષ દ્વારા વ્યૂહાત્મક રીતે ઉમેદવારોને સુરક્ષિત સ્થળે મોકલી દેવાનો નિર્ણય લેવાયો છે. કલોલ નગરપાલિકાના 20થી વધુ ઉમેદવારોને પક્ષ દ્વારા અન્ય સ્થળે ખસેડવામાં આવ્યા છે. નડિયાદ  કોંગ્રેસના 25 જેટલા ઉમેદવારોને રાતોરાત અજ્ઞાત સ્થળે લઈ જવામાં આવ્યા છે.

સુદામાપુરી પોરબંદરમાં પણ કોંગ્રેસે સાવચેતી વાપરી 32 ઉમેદવારોને સુરક્ષિત સ્થળે મોકલ્યા છે. અન્ય વિસ્તારોની પાલિકાના 4 અને પંચાયતના 3 ઉમેદવારો સહિત અન્ય 12 ઉમેદવારોને પણ સંપર્ક વિહોણા કરી દેવામાં આવ્યા છે. કોંગ્રેસના મતે, જ્યાં સુધી ફોર્મ પરત ખેંચવાની પ્રક્રિયા પૂર્ણ ન થાય ત્યાં સુધી આ ઉમેદવારોને પરત લાવવામાં આવશે નહીં.

કોંગ્રેસના નેતાઓએ ભારતીય જનતા પાર્ટી પર ગંભીર આક્ષેપો કરતા જણાવ્યું છે કે, સત્તાધારી પક્ષ સામ, દામ, દંડ અને ભેદની નીતિ અપનાવી રહ્યો છે. કોંગ્રેસનો દાવો છે કે ભાજપ તેમના મજબૂત ઉમેદવારોને ડરાવી-ધમકાવી અથવા લાલચ આપીને ફોર્મ પરત ખેંચાવવા માટે દબાણ કરી રહ્યું છે. લોકશાહીના મૂલ્યોને જાળવવા અને ઉમેદવારોને તોડજોડના રાજકારણથી બચાવવા માટે આ પગલું ભરવું અનિવાર્ય બન્યું હોવાનું કોંગ્રેસે જણાવ્યું છે.

રાજકોટ મહાનગરપાલિકાની ચૂંટણીમાં પણ રિસોર્ટ પોલિટિક્સ ગાજ્યું છે. જોકે, રાજકોટ શહેર ભાજપ પ્રમુખ માધવ દવે એ આ આક્ષેપોને પાયાવિહોણા ગણાવી ફગાવી દીધા છે. માધવ દવેએ પલટવાર કરતા કહ્યું કે, "ભાજપ પાસે કાર્યકરોની મોટી ફોજ છે. અમે કોઈ પણ ઉમેદવારનો સંપર્ક કર્યો નથી. ભાજપ હંમેશા પોતાની લીટી લાંબી કરવામાં માને છે, બીજાની લીટી ટૂંકી કરવામાં નહીં."

ભાજપના મુખ્ય પ્રવક્તા ડૉ. અનિલ પટેલે કોંગ્રેસના આ 'ઓપરેશન અજ્ઞાત' ને 'ઉમેદવાર સંતાડો અભિયાન' ગણાવ્યું છે. તેમણે વ્યંગ કરતા કહ્યું કે, "કોંગ્રેસને પોતાના જ ઉમેદવારો પર વિશ્વાસ નથી. જે પક્ષને પોતાના સાથીઓ પર ભરોસો ન હોય તે જનતાનો વિશ્વાસ કેવી રીતે જીતશે? ૨૮મી તારીખે પરિણામ આવશે ત્યારે કોંગ્રેસે મોં સંતાડવાનો વારો આવશે." તેમણે વધુમાં ઉમેર્યું કે કોંગ્રેસના નેતાઓ જ ટિકિટ માટે પૈસા માંગતા હોવાનો પર્દાફાશ થયો છે, જે તેમની આંતરિક નબળાઈ દર્શાવે છે.

સુરતના પૂર્વ મેયર હેમાલીબેન બોઘાવાલાએ પણ કોંગ્રેસ પર પ્રહારો કર્યા છે. તેમણે જણાવ્યું કે ભાજપને કોઈને ખરીદવાની જરૂર નથી કારણ કે જનતા વિકાસ જોઈને ભાજપ સાથે જોડાઈ રહી છે. ભાજપ અનેક બેઠકો પર બિનહરીફ જીતી રહ્યું છે જે જનતાના વિશ્વાસનું પ્રતીક છે.

બીજી તરફ, મોરબી જિલ્લા ભાજપ પ્રમુખ જયંતિ રાજકોટિયાએ પણ કોંગ્રેસના આક્ષેપોને ડરનું પરિણામ ગણાવ્યું છે. તેમણે કહ્યું કે કોંગ્રેસ યોગ્ય ઉમેદવારો ઉભા રાખી શકી નથી અને હવે પોતાની નિષ્ફળતા છુપાવવા માટે આ પ્રકારના નાટકો કરી રહી છે.

સ્થાનિક સ્વરાજ્યની આ ચૂંટણી માત્ર સત્તા મેળવવાનો જંગ નથી, પરંતુ અસ્તિત્વ ટકાવી રાખવાની લડાઈ બની ગઈ છે. ફોર્મ પરત ખેંચવાની મુદત બાદ જ ખબર પડશે કે કોના દાવામાં કેટલું દમ છે. પરંતુ હાલ તો ગુજરાતનું રાજકારણ રિસોર્ટ, અજ્ઞાત સ્થળો અને આક્ષેપ-પ્રતિઆક્ષેપ વચ્ચે ઘેરાયેલું જોવા મળી રહ્યું છે.