પાવાગઢ : પંચમહાલ જિલ્લામાં સ્થિત જગપ્રસિદ્ધ યાત્રાધામ અને પવિત્ર શક્તિપીઠ પાવાગઢ ખાતે આસો નવરાત્રિના પાવન પર્વ નિમિત્તે ભક્તિ અને શ્રદ્ધાનો અદ્ભુત માહોલ જોવા મળી રહ્યો છે. આસો નવરાત્રિના પ્રથમ દિવસથી લઈને સાતમા નોરતા સુધીના સમયગાળા દરમિયાન અત્યાર સુધીમાં ૮ લાખથી પણ વધુ શ્રદ્ધાળુઓ અને માઈભક્તો મા મહાકાળીના દર્શન કરી ધન્યતા અનુભવી ચૂક્યા છે.

સાતમા નોરતાની વહેલી સવારે ૫:૦૦ કલાકે જેવાં જ મા મહાકાળી મંદિરના નિજ દ્વાર ભક્તો માટે ખોલવામાં આવ્યા, તે સાથે જ સમગ્ર પાવાગઢ ડુંગર "જય માતાજી" અને "જય મહાકાળી" ના બુલંદ જયઘોષથી ગુંજી ઊઠ્યો હતો. વહેલી સવારથી જ રોપ-વે સ્ટેશન તેમજ પગથિયાં વાળા પરંપરાગત માર્ગો પર માઈભક્તોની ભારે અવરજવર શરૂ થઈ ગઈ હતી. દર્શન માટે મંદિર પરિસરમાં ભક્તોની કિલોમીટરો લાંબી કતારો જોવા મળી હતી.

યાત્રાધામ ખાતે ઉમટેલી લાખો ભક્તોની ભીડ વચ્ચે સાતમા નોરતે એક શારીરિક રીતે દિવ્યાંગ ભક્તની મા મહાકાળી પ્રત્યેની અનન્ય આસ્થા સૌના આકર્ષણનું કેન્દ્ર બની હતી. પગથિયાં ચઢવામાં ભારે અસમર્થતા હોવા છતાં, આ દિવ્યાંગ ભક્ત હિંમત હાર્યા વગર બેઠા-બેઠા એક-એક પગથિયું સરકીને ઉપર માના ધામ તરફ આગળ વધી રહ્યા હતા. તેમની આ અવિચળ શ્રદ્ધા જોઈને ત્યાં ઉપસ્થિત અન્ય ભક્તોની આંખો પણ ભીની થઈ ગઈ હતી.

પાવાગઢ ખાતે બિરાજમાન મા મહાકાળી પ્રત્યે માત્ર ગુજરાત જ નહીં, પરંતુ સમગ્ર ભારત દેશ અને વિદેશોમાંથી આવતા લાખો શ્રદ્ધાળુઓની અખંડ શ્રદ્ધા અને આસ્થા જોડાયેલી છે. નવરાત્રિના પાવન દિવસોમાં દરરોજ વિશાળ જનમેદની ઉમટી રહી છે. સાતમા નોરતે પણ અવિરતપણે વહેતા ભક્તોના માનવ મહેરામણથી આખુંય પાવાગઢ ધામ ભક્તિરસમાં લીન થઈ ગયું હતું.

મંદિર ટ્રસ્ટ અને સ્થાનિક વહીવટીતંત્ર દ્વારા ભક્તોની ભીડને સુચારુ રીતે નિયંત્રિત કરવા માટે કડક સુરક્ષા બંદોબસ્ત અને પીવાના પાણી સહિતની સુવિધાઓ ઉભી કરવામાં આવી છે. લાંબી કતારો અને ગરમી હોવા છતાં ખેલૈયાઓ અને ભક્તોએ અત્યંત ધૈર્ય, શાંતિ અને ઉત્સાહપૂર્વક પોતાની વારીની રાહ જોઈ માતાજીના દર્શન કર્યા હતા.

પાવાગઢ ડુંગર પર માના આશીર્વાદ મેળવીને પરત ફરતા તમામ શ્રદ્ધાળુઓએ પોતાના પરિવાર અને રાજ્યમાં સુખ, શાંતિ, આરોગ્ય અને સમૃદ્ધિની પ્રાર્થના કરી હતી. આગામી આઠમ અને નોમના પવિત્ર દિવસો દરમિયાન પાવાગઢ ખાતે દર્શાનાર્થીઓનો આંકડો નવો રેકોર્ડ સર્જશે તેવી શક્યતા વ્યક્ત કરવામાં આવી રહી છે.