વડોદરા: ઉનાળાના આરંભે જ વધતા જતા તાપમાનની સાથે હવે આગની ઘટનાઓએ પણ માથું ઊંચક્યું છે, જેમાં રવિવારે વહેલી સવારે વડોદરાના ફતેપુરા કુંભારવાડા વિસ્તારમાં એક હૃદયદ્રાવક ઘટના સામે આવી હતી. કાચવાલા હોલની બિલકુલ સામે આવેલી 'સાંઈદીપ પ્લાસ્ટિક એન્ડ ડિસ્પોઝલ' નામની દુકાનમાં વહેલી સવારે પાંચ વાગ્યાના અરસામાં અકસ્માતે આગ ફાટી નીકળી હતી. પ્લાસ્ટિક અને ડિસ્પોઝલ આઈટમોનો જથ્થો હોવાને કારણે આગે પળવારમાં રૌદ્ર સ્વરૂપ ધારણ કરી લીધું હતું અને આખી ઇમારત ધુમાડાના કાળા ડિબાંગ વાદળોમાં ઘેરાઈ ગઈ હતી, જેનાથી સમગ્ર વિસ્તારમાં ભય અને ફફડાટનો માહોલ ફેલાઈ ગયો હતો.
આ ભીષણ દુર્ઘટનામાં સૌથી કપરી પરિસ્થિતિ ત્યારે સર્જાઈ જ્યારે જાણવા મળ્યું કે દુકાનની ઉપરના માળે બે વ્યક્તિઓ ફસાયેલા છે. આગની જ્વાળાઓ નીચેના ભાગે પ્રસરેલી હોવાથી બહાર નીકળવાનો કોઈ રસ્તો બચ્યો નહોતો. ઘટનાની ગંભીરતા જોતા દાંડિયા બજાર અને પાણીગેટ ફાયર સ્ટેશનની ટીમો તાત્કાલિક ઘટનાસ્થળે પહોંચી હતી. ફાયર ફાઈટરોએ અપ્રતિમ સાહસ બતાવી, આગની લપેટો અને ગૂંગળાવી દેતા ધુમાડા વચ્ચે સીડીની મદદથી ઉપરના માળે પહોંચીને બંને વ્યક્તિઓને હેમખેમ બહાર કાઢ્યા હતા. આ દિલધડક રેસ્ક્યુ ઓપરેશન જોઈને ત્યાં હાજર સ્થાનિક લોકોએ પણ હાશકારો અનુભવ્યો હતો.
દુકાન માલિક ભગવાનદાસ ચાંદવાનીના જણાવ્યા અનુસાર, છેલ્લા પાંચ વર્ષથી કાર્યરત આ વ્યવસાયમાં વહેલી સવારની આ દુર્ઘટનાએ મોટું આર્થિક સંકટ ઊભું કર્યું છે. આગ એટલી પ્રચંડ હતી કે ફાયર બ્રિગેડની અનેક ટીમો દ્વારા સતત પાણીનો મારો ચલાવવા છતાં અંદર રહેલો તમામ માલસામાન બળીને ખાખ થઈ ગયો હતો. પ્રાથમિક અંદાજ મુજબ આ આગમાં અંદાજે 35 થી 40 લાખ રૂપિયાનું નુકસાન થયું હોવાનું માનવામાં આવે છે. આગ લાગવાનું સચોટ કારણ હજુ સ્પષ્ટ થયું નથી, પરંતુ શોર્ટ સર્કિટને કારણે આ હોનારત સર્જાઈ હોવાની આશંકા સેવાઈ રહી છે.