સુરત:શહેરમાં અંધશ્રદ્ધાનો લાભ ઉઠાવી લોકોને લાખોનો ચૂનો લગાવતી એક રીઢા ઠગોની ટોળકીને પકડી પાડવામાં પોલીસને મોટી સફળતા મળી છે. સુરતના લસકાણા અને ઉત્રાણ વિસ્તારમાં તાંત્રિક વિધિના બહાને લોકોના સોના-ચાંદીના ઘરેણાં પડાવી લેતી ટોળકીના બે સાગરીતોને પોલીસે રાજકોટ ખાતેથી ઝડપી પાડ્યા છે. આ ઠગો ખાસ કરીને કાઠિયાવાડ પંથકના શ્રદ્ધાળુ વૃદ્ધ પુરુષો અને મહિલાઓને સોફ્ટ ટાર્ગેટ બનાવી છેતરપિંડી આચરતા હતા.

પકડાયેલા આરોપીઓની ઓળખ કાળુનાથ નકુમ અને દેવાયત રાઠોડ તરીકે થઈ છે. આ ઠગોની મોડસ ઓપરેન્ડી જાણીને પોલીસ પણ ચોંકી ગઈ છે. તેઓ સૌપ્રથમ જે તે વિસ્તારમાં રેકી કરતા  હતા. ત્યારબાદ જે-તે ઘરે જઈને 'રામાપીરના મંડળમાં જમવા આવજો' તેમ કહીને લોકો સાથે ઓળખાણ વધારી ઘરમાં પ્રવેશ મેળવતા હતા. ઘરમાં ગયા બાદ પરિવારના સભ્યોને ડરાવતા કે, "તમારા ઘરમાં ભારે પિતૃદોષ છે, જેના કારણે ઘરમાં બીમારી રહે છે અને પૈસા ટકતા નથી."

આ ભયનો લાભ ઉઠાવી તેઓ તાંત્રિક વિધિ શરૂ કરતા હતા. વિધિ દરમિયાન તેઓ ગ્લાસ, કંકુ, ચોખા અને પાણીની સાથે ઘરમાં રહેલા સોનાના દાગીના મંગાવતા હતા. જાપ કરવાના બહાને નજર ચૂકવીને તેઓ દાગીના પડાવી ત્યાંથી રફુચક્કર થઈ જતા હતા. આ શાતિર ઠગો ચોરી કરેલા સોનાના ઘરેણાંને તરત જ પીગળાવીને તેની સોનાની લંગડી  બનાવી લેતા હતા જેથી કોઈ ઓળખી ન શકે, અને બાદમાં તેને બજારમાં વેચી મારતા હતા.

લસકાણા પોલીસે ટેકનિકલ સર્વેલન્સના આધારે આ બંને ઠગની રાજકોટ થી ધરપકડ કરી લીધી છે. પ્રાથમિક પોલીસ તપાસમાં લસકાણા અને ઉત્રાણ વિસ્તારના બે મોટા ગુનાઓનો ભેદ ઉકેલાયો છે. પોલીસે આરોપીઓ પાસેથી 200000 થી વધુની કિંમતનો મુદ્દામાલ જપ્ત કર્યો છે. હાલ પોલીસ આ બંનેની સઘન પૂછપરછ કરી રહી છે, જેમાં સુરત સહિત ગુજરાતના અન્ય શહેરોમાં આચરેલા વધુ ગુનાઓનો ભેદ ઉકેલાય તેવી પૂરેપૂરી શક્યતા છે.