દાહોદ, તા. 6 : દાહોદ જિલ્લાના રળિયાતી ગામની સીમમાં આવેલી એક બાંધકામ સાઇટ પર ચોકીદાર તરીકે ફરજ બજાવતા આધેડની પથ્થરના ઘા ઝીંકી નિર્મમ હત્યા કરી દેવાની સનસનીખેજ ઘટના સામે આવી છે. માનવતાને શરમાવે તેવી ક્રૂરતાથી આચરવામાં આવેલી આ ઘટનાથી સમગ્ર રળિયાતી પંથકમાં ચકચાર મચી ગઈ છે.

પ્રાથમિક માહિતી મુજબ, મોડી રાત્રિના સમયે બાંધકામ સાઇટ પર ચોકીદાર એકલો હાજર હતો. તે દરમિયાન અજાણ્યા હુમલાખોરોએ સાઇટ પર આવી સૂતેલા ચોકીદારના માથાના ભાગે તેમજ શરીરે પથ્થરના ઉપરાછાપરી ઘા ઝીંકી મોતને ઘાટ ઉતારી દીધો હતો. વહેલી સવારે અન્ય કામદારો સાઇટ પર પહોંચતા ચોકીદાર લોહીલુહાણ હાલતમાં મૃત મળી આવ્યો હતો.

ઘટનાની જાણ થતાં જ દાહોદ પોલીસનો કાફલો તાત્કાલિક ઘટનાસ્થળે દોડી ગયો હતો. પોલીસે પંચનામા સહિતની કાર્યવાહી કરી મૃતદેહને પીએમ અર્થે ખસેડ્યો હતો. હાલ પોલીસે અજાણ્યા આરોપીઓ વિરુદ્ધ હત્યાનો ગુનો નોંધી વધુ તપાસ હાથ ધરી છે.

દાહોદ પોલીસ દ્વારા હત્યા પાછળનું ચોક્કસ કારણ જાણવા આસપાસના સીસીટીવી કેમેરાના ફૂટેજ, ડમ્પ ડેટા અને ટેક્નિકલ સર્વેલન્સની મદદથી તપાસનો ધમધમાટ શરૂ કરાયો છે. બાંધકામ સાઇટ પર ચોરીના ઇરાદે આવેલા તત્વો દ્વારા કે પછી અંગત અદાવતમાં હત્યા કરવામાં આવી છે તે દિશામાં પોલીસે તપાસ કેન્દ્રિત કરી છે. હાલ ફરાર આરોપીઓને ઝડપી લેવા પોલીસે અલગ-અલગ ટીમો બનાવી તપાસ તેજ કરી છે.