(અશ્વિન વ્યાસ દ્વારા) ગાંધીનગર:સમગ્ર રાજ્યભરમાં ચાલી રહેલા 'સેવા સંકલ્પ અભિયાન' અંતર્ગત ગાંધીનગર સ્થિત લોકભવન ખાતે સ્વચ્છતા અભિયાનનું વિશેષ આયોજન કરવામાં આવ્યું હતું. રાજ્યપાલના સચિવ મેહુલ કે. દવેની અધ્યક્ષતા અને માર્ગદર્શન હેઠળ યોજાયેલા આ કાર્યક્રમમાં લોકભવનના અધિકારીઓ અને કર્મચારીઓએ મોટી સંખ્યામાં સક્રિયતાથી ભાગ લઈ સ્વચ્છતા શ્રમદાન કર્યું હતું.

આ પ્રસંગે 'સ્વચ્છતા હી સેવા'ના મંત્રને ચરિતાર્થ કરતા રાજ્યપાલના સચિવ મેહુલ કે. દવેએ જણાવ્યું હતું કે, સ્વચ્છતા એ માત્ર એક ઝુંબેશ નથી પરંતુ આપણી દૈનિક કાર્યસંસ્કૃતિનો સહજ હિસ્સો હોવો જોઈએ. લોકભવન પરિસરને વધુ સ્વચ્છ, સુંદર અને પર્યાવરણપ્રિય બનાવવાના ઉદ્દેશ્ય સાથે હાથ ધરાયેલી આ ઝુંબેશમાં અધિકારીઓ અને કર્મચારીઓએ ઉત્સાહભેર સહભાગી થઈને ઉદાહરણીય શ્રમદાન આપ્યું હતું.