દાહોદ : દાહોદ જિલ્લાના ગરબાડા તાલુકાના બોરીયાલા અંતર્ગત આવતા નાની બોરીયાલી ગામમાંથી માનવતાને હચમચાવી મૂકે તેવી એક અત્યંત દુઃખદ ઘટના પ્રકાશમાં આવી છે.

 ગામમાં રહેતી એક ૮ વર્ષીય માસૂમ બાળકી પોતાના ઘરમાં રાબેતા મુજબ ઉત્સાહભેર અભ્યાસ કરવા માટે બેઠી હતી. ભણતી વખતે પોતાની ચોપડી લેવા માટે તે ઘરના ખૂણામાં રાખેલા લાકડાના પાટિયા તરફ ગઈ હતી, જ્યાં સંતાઈને બેઠેલા એક અત્યંત ઝેરી સાપે બાળકી પર ઓચિંતો હુમલો કરી દીધો હતો.

લાકડાના પાટિયા પરથી ચોપડી ઉતારવા જતાં જ નરાધમ સાપે બાળકીના ડાબા પગના અંગૂઠા પર જોરદાર ડંખ માર્યો હતો. સાપ કરડ્યાની જાણ થતાં જ બાળકીએ જોરજોરથી બૂમાબૂમ કરી મૂકી હતી, જેથી પરિવારના સભ્યો તાત્કાલિક દોડી આવ્યા હતા. બાળકીના શરીરમાં ઝેર ફેલાતું રોકવા માટે તેને અત્યંત ગંભીર હાલતમાં તાબડતોબ નજીકની સરકારી હોસ્પિટલમાં સારવાર અર્થે ખસેડવામાં આવી હતી. જો કે, હોસ્પિટલના બિછાને જિંદગી અને મોત વચ્ચેની જંગ લડ્યા બાદ આખરે માસૂમ બાળકીનું સારવાર દરમિયાન કમકમાટીભર્યું મોત નીપજ્યું હતું.

આ ગમખ્વાર ઘટનાની સત્તાવાર જાણ હોસ્પિટલ પ્રશાસન દ્વારા સ્થાનિક પોલીસને કરવામાં આવી હતી. ગરબાડા પોલીસ સ્ટેશનના અધિકારીઓએ હોસ્પિટલ પહોંચીને બાળકીના મૃતદેહનું પોસ્ટમોર્ટમ કરાવવાની તજવીજ હાથ ધરી હતી અને સમગ્ર મામલે હાલ પૂરતો અકસ્માત મોતનો ગુનો નોંધીને આગળની કાયદેસરની તપાસ શરૃ કરી દીધી છે. ભણવાના સમયે જ કાળનો કોળિયો બનેલી આશાસ્પદ દીકરીના અકાળે અવસાનથી કમનસીબ પરિવાર પર જાણે આભ તૂટી પડ્યું છે અને સમગ્ર ગામમાં ઘેરા શોકની ગમગીની છવાઈ ગઈ છે.