( ભરત શાહ દ્વારા ) નર્મદા :નર્મદા જિલ્લામાં ૭૭ મા જિલ્લા કક્ષાના વન મહોત્સવની ઉજવણી એકલવ્ય મોડેલ રેસિડેન્શિયલ સ્કૂલ, ગોરા ખાતે ભરૂચના સાંસદ મનસુખભાઈ વસાવાની અધ્યક્ષતા તેમજ જિલ્લા પંચાયતના પ્રમુખ અંજનાબેન વસાવા અને નાંદોદના ધારાસભ્ય ડો. દર્શનાબેન દેશમુખની પ્રેરક ઉપસ્થિતિમાં કરવામાં આવી હતી.
    આ પ્રસંગે ભરૂચના સાંસદ મનસુખભાઈ વસાવાએ જણાવ્યું હતું કે, વન મહોત્સવ એટલે માત્ર વૃક્ષ વાવવાનો ઉત્સવ નહીં, પરંતુ વૃક્ષોના ઉછેર અને જતનની જવાબદારીનો ઉત્સવ છે. તેમણે જણાવ્યું હતું કે, વડાપ્રધાન નરેન્દ્રભાઈ મોદીના નેતૃત્વમાં વર્ષ ૨૦૪૭ સુધીમાં વિકસિત ભારતના નિર્માણ માટે વિવિધ અભિયાનો હાથ ધરવામાં આવી રહ્યા છે. પર્યાવરણનું સંરક્ષણ અને વૃક્ષારોપણ પણ આ સંકલ્પનો મહત્વપૂર્ણ હિસ્સો છે.
   તેમણે વધુમાં જણાવ્યું હતું કે, પ્રકૃતિ છે તો મનુષ્યનું અસ્તિત્વ છે. તેથી વધુમાં વધુ વૃક્ષોનું વાવેતર કરવાની સાથે તેમનું જતન કરવું એ આપણી સૌની સામૂહિક જવાબદારી છે. ઘર, ગામ તથા ખેતરની આસપાસ વૃક્ષો વાવવાથી પર્યાવરણની સુંદરતા વધે છે તેમજ પર્યાવરણ અને માનવજીવનને અનેકવિધ લાભ મળે છે.    

  નાંદોદના ધારાસભ્ય ડો. દર્શનાબેન દેશમુખે વૃક્ષો અને પર્યાવરણના મહત્વ અંગે વિસ્તૃત જાણકારી આપતાં નર્મદા જિલ્લાને વધુ હરિયાળો અને પર્યાવરણપ્રેમી જિલ્લો બનાવવા સૌને સહભાગી થવા આહ્વાન કર્યું હતું.
   જિલ્લા કલેકટર ગંગાસિંઘે જણાવ્યું હતું કે, જિલ્લા કક્ષાના વન મહોત્સવનો મુખ્ય ઉદ્દેશ લોકોમાં વૃક્ષારોપણ તથા વૃક્ષોના જતન અંગે જાગૃતિ લાવવાનો છે. તેમણે નાગરિકોને ગ્રામ પંચાયત, તાલુકા પંચાયત તથા જિલ્લા કક્ષાએ ઊભા કરવામાં આવેલા ‘વન કવચ’ની મુલાકાત લેવા તેમજ વન વિભાગનો સંપર્ક કરી વૃક્ષારોપણ અને ઉછેરની પ્રવૃત્તિમાં સહભાગી થવા અનુરોધ કર્યો હતો.
કાર્યક્રમના પ્રારંભે સામાજિક વનીકરણ વિભાગના નાયબ વન સંરક્ષક ગૌરવ પ્રજાપતિએ ઉપસ્થિત મહાનુભાવો તથા નાગરિકોનું શાબ્દિક સ્વાગત કર્યું હતું. આ પ્રસંગે વિદ્યાર્થીઓ દ્વારા પર્યાવરણ જાગૃતિને લગતી વિવિધ પ્રસ્તુતિઓ રજૂ કરવામાં આવી હતી.
વન મહોત્સવ અંતર્ગત ઉપસ્થિત મહાનુભાવોના હસ્તે લાભાર્થીઓને પ્રશસ્તિપત્રો તથા ચેકનું વિતરણ કરવામાં આવ્યું હતું. કાર્યક્રમના અંતે મહાનુભાવોના હસ્તે એક પેડ માં કે નામ 3.0 અંતર્ગત વૃક્ષારોપણ કરવામાં આવ્યું હતું તેમજ વન મહોત્સવના સંદેશને જનજન સુધી પહોંચાડવા માટે વૃક્ષરથને લીલીઝંડી આપી પ્રસ્થાન કરાવવામાં આવ્યું હતું.
સમગ્ર કાર્યક્રમનું આયોજન નર્મદા જિલ્લા વહીવટી તંત્ર અને સામાજિક વનીકરણ વિભાગ, નર્મદા દ્વારા કરવામાં આવ્યું હતું.