અંબાજી : ઉત્તર ગુજરાતના બનાસકાંઠા જિલ્લાના દાંતા તાલુકામાં સ્થિત સુપ્રસિદ્ધ યાત્રાધામ અંબાજી એ ભારતભરના કરોડો માઈભક્તોની અવિચળ આસ્થા અને શ્રદ્ધાનું પ્રતીક છે. ૫૧ શક્તિપીઠો પૈકી માં અંબાના હૃદયસ્થ સ્થાનક તરીકે પૂજાતા આ પવિત્ર ધામમાં દરોજ દેશ-વિદેશમાંથી લાખો શ્રદ્ધાળુઓ શીશ નમાવવા આવે છે. શ્રદ્ધાળુઓ અવારનવાર મા અંબાના ચરણોમાં સોના-ચાંદીના કિંમતી આભૂષણો કે છત્ર ભેટ ધરી પોતાની મનોકામના પૂર્ણ થતાં કૃતજ્ઞતા વ્યક્ત કરતા હોય છે. તેવામાં રાજુલાના એક અનન્ય માઈભક્તે મા અંબાના ચરણોમાં સુંદર ચાંદીની પાદુકા અર્પણ કરીને પોતાની અપાર ભક્તિ વ્યક્ત કરી છે.

રાજુલાથી અંબાજી ધામે દર્શનાર્થે પધારેલા આ ભાવિકે માં અંબાના શ્રીચરણોમાં ૩૬૦ ગ્રામ વજન ધરાવતી સુશોભિત ચાંદીની પાદુકા ભેટ આપી હતી. આકર્ષક કૌશલ્ય સાથે તૈયાર કરાયેલી આ પાદુકાની વર્તમાન બજાર કિંમત આશરે રૂ. ૮૨,૮૦૦ થવા જાય છે. અંબાજી મંદિર દેવસ્થાન ટ્રસ્ટ દ્વારા આ ભેટનો સહર્ષ સ્વીકાર કરવામાં આવ્યો હતો અને માઈભક્તને વિધિવત સન્માનિત કરવામાં આવ્યા હતા.

અગાઉ મળ્યો હતો રૂ. ૪૩.૫૧ લાખનો સુવર્ણ-રત્નજડિત મુગુટ

અંબાજી મંદિરમાં માઈભક્તો દ્વારા સોના-ચાંદીના અલંકારો ભેટ આપવાની પરંપરા સદીઓ જૂની છે. અગાઉ ગત જાન્યુઆરી મહિનામાં અમદાવાદના 'જય ભોલે ગ્રુપ'ના દિપેશ પટેલ દ્વારા મંદિર ટ્રસ્ટને અત્યંત ભવ્ય અને કિંમતી સુવર્ણ મુગુટ ભેટ આપવામાં આવ્યો હતો.

જિલ્લા કલેક્ટરની વિશેષ ઉપસ્થિતિમાં અર્પણ કરાયેલા આ મુગુટની ખાસિયતો:

• કિંમત: રૂ. ૪૩.૫૧ લાખ

• કારીગરી: કૌશલ્યપૂર્વક પ્રાચીન મીનાકારી અને કિંમતી રત્નોનો ઉપયોગ

• સમયગાળો: અતિ આકર્ષક ડિઝાઇન તૈયાર કરવામાં કુશળ કારીગરોને પૂરા ૩ મહિનાનો સમય લાગ્યો હતો.

અંબાજી ધામમાં શ્રદ્ધાળુઓ દ્વારા આવી ભવ્ય ભેટ-સોગાદો અર્પણ કરવાનો સિલસિલો નિરંતર ચાલુ રહે છે, જે ભક્તોનો માં અંબા પ્રત્યેનો અખૂટ વિશ્વાસ દર્શાવે છે.