સંઘપ્રદેશ દમણમાં દરિયામાં ડૂબી જવાની એક દુઃખદ ઘટના સામે આવી છે. નાની દમણ જેટી પાસે દરિયામાં એક 17 વર્ષીય સગીર ડૂબી ગયો હોવાની માહિતી મળી છે. ઘટનાની જાણ થતાં દમણ ફાયર બ્રિગેડ અને રેસ્ક્યુ ટીમ તાત્કાલિક ઘટનાસ્થળે પહોંચી હતી અને દરિયામાં ડૂબેલા યુવકની શોધખોળની કામગીરી શરૂ કરવામાં આવી છે

મળતી માહિતી મુજબ, ઘટના નાની દમણ જેટી પાસે બની હતી. અહીં દરિયામાં એક સગીર ડૂબી જતાં આસપાસના લોકોમાં અફરાતફરીનો માહોલ સર્જાયો હતો. સ્થાનિક લોકોએ તરત જ તંત્રને જાણ કરતાં ફાયર બ્રિગેડ અને રેસ્ક્યુ ટીમ સ્થળ પર દોડી આવી હતી. ત્યારબાદ દરિયામાં સર્ચ ઓપરેશન શરૂ કરવામાં આવ્યું હતું.

ડૂબી ગયેલા સગીરની ઓળખ આકાશ કુમાર તરીકે થઈ છે. તે 17 વર્ષનો સગીર હોવાનું જાણવા મળ્યું છે. વધુમાં મળતી માહિતી અનુસાર, આકાશ કુમાર રીંગણ વાળામાં મુકુલભાઈની ચાલમાં રહેતો હતો. ઘટનાના સમાચાર મળતા પરિવારજનો અને સ્થાનિક લોકો પણ ઘટનાસ્થળે પહોંચી ગયા હતા. દમણ ફાયર બ્રિગેડ અને રેસ્ક્યુ ટીમે દરિયામાં ડૂબેલા યુવકને શોધવા માટે સતત કામગીરી હાથ ધરી છે. દરિયાની પરિસ્થિતિને ધ્યાનમાં રાખીને સર્ચ ઓપરેશન ચલાવવામાં આવી રહ્યું છે. યુવકની શોધખોળ માટે તમામ જરૂરી પ્રયાસો કરવામાં આવી રહ્યા છે.

નોંધનીય છે કે હાલમાં તંત્ર દ્વારા દરિયામાં નાહવા પર પ્રતિબંધ મૂકવામાં આવ્યો છે. દરિયાની પરિસ્થિતિ અને સલામતીને ધ્યાનમાં રાખીને લોકોને દરિયામાં ઉતરવાની મનાઈ કરવામાં આવી છે. તેમ છતાં આ ઘટના બનતા ફરી એકવાર દરિયાકાંઠે સુરક્ષાને લઈને સવાલો ઊભા થયા છે.

અધિકારીઓએ લોકોને તંત્રની સૂચનાઓનું પાલન કરવાની અપીલ કરી છે. દરિયામાં નાહવા અથવા જોખમી વિસ્તારોમાં જવાનું ટાળવા માટે પણ લોકોને સમજાવવામાં આવી રહ્યું છે. ખાસ કરીને વરસાદી મોસમ દરમિયાન દરિયામાં કરંટ અને ઊંચા મોજાંના કારણે અકસ્માતની શક્યતા વધી જતી હોવાથી સાવચેતી રાખવી જરૂરી હોવાનું જણાવવામાં આવી રહ્યું છે. હાલ ફાયર બ્રિગેડ અને રેસ્ક્યુ ટીમ દ્વારા દરિયામાં ડૂબેલા 17 વર્ષીય સગીર આકાશ કુમારની શોધખોળની કામગીરી સતત ચાલુ છે. સમગ્ર ઘટનાને લઈને સ્થાનિક તંત્ર પરિસ્થિતિ પર નજર રાખી રહ્યું છે અને આગળની કાર્યવાહી હાથ ધરવામાં આવી રહી છે.