ગાંધીનગર: પશ્ચિમ ભારતના અગ્રણી ડોમેસ્ટિક અને આઉટબાઉન્ડ ટ્રાવેલ માર્કેટ તરીકે ગુજરાતની સ્થિતિ વધુ મજબૂત બની રહી છે. ગાંધીનગરના પ્રતિષ્ઠિત મહાત્મા મંદિર કન્વેન્શન એન્ડ એક્ઝિબિશન સેન્ટર ખાતે યોજાયેલ ત્રણ દિવસીય 'TTF અમદાવાદ-૨૦૨૬' ટ્રાવેલ ટ્રેડ શોનું અદ્ભુત અને સફળતાપૂર્વક સમાપન થયું છે. ૬ થી ૮ ઓગસ્ટ દરમિયાન યોજાયેલા આ પ્રદર્શનમાં ગયા વર્ષની તુલનામાં ટ્રેડ વિઝિટર્સની સંખ્યામાં ૧૦% નો નોંધપાત્ર વધારો જોવા મળ્યો છે, જે આગામી તહેવારો અને શિયાળાની ટ્રાવેલ સિઝન માટે પ્રવાસન ઉદ્યોગમાં મજબૂત માંગનો સંકેત આપે છે.

ફેરફેસ્ટ મીડિયા દ્વારા આયોજિત આ ભવ્ય શોમાં ભારત દેશના ૨૭ રાજ્યો અને કેન્દ્રશાસિત પ્રદેશો ઉપરાંત ૧૦ વિદેશી દેશોના ૯૦૦ થી વધુ એક્ઝિબિટર્સે ભાગ લીધો હતો. ત્રણ દિવસ દરમિયાન ૧૬,૫૦૦ થી વધુ ટ્રાવેલ પ્રોફેશનલ્સ અને મુલાકાતીઓએ એક્ઝિબિશનની મુલાકાત લીધી હતી. આ પ્લેટફોર્મ પર દેશ-વિદેશના ટૂરિઝમ બોર્ડ, હોસ્પિટાલિટી બ્રાન્ડ્સ, એરલાઇન્સ, ટૂર ઓપરેટર્સ અને ટ્રાવેલ ટેક્નોલોજી પ્રોવાઇડર્સ એક જ મંચ પર એકઠા થયા હતા.

આ મેગા ઇવેન્ટનું ઉદ્ઘાટન મુખ્ય અતિથિ તરીકે ગુજરાતના મુખ્યમંત્રી ભૂપેન્દ્ર પટેલના હસ્તે કરવામાં આવ્યું હતું. આ પ્રસંગે ગુજરાતના નાયબ મુખ્યમંત્રી હર્ષ સંઘવી, ઉત્તરાખંડના પ્રવાસન મંત્રી સતપાલ મહારાજ, ગોવાના પ્રવાસન મંત્રી રોહન એ. ખોન્ટે અને ગુજરાત ટૂરિઝમના વરિષ્ઠ આઇએએસ (IAS) અધિકારીઓ વિશેષ ઉપસ્થિત રહ્યા હતા. ફેરફેસ્ટ મીડિયાના સીએમડી સંજીવ અગરવાલે જણાવ્યું હતું કે ત્રણ રાજ્યોના મંત્રીઓની હાજરી અને ૧૦% વિઝિટર્સનો વધારો એ સાબિત કરે છે કે ભારતીય અર્થતંત્રમાં ટ્રાવેલ અને ટૂરિઝમ ક્ષેત્રનું મહત્ત્વ અભૂતપૂર્વ ઝડપે વધી રહ્યું છે.