અમદાવાદના દરિયાપુર વિસ્તારમાં આવેલા મનપસંદ જીમખાના પર સ્ટેટ મોનિટરિંગ સેલ (SMC) દ્વારા પાડવામાં આવેલી હાઈપ્રોફાઇલ રેડ બાદ કેસમાં મહત્વપૂર્ણ કાનૂની કાર્યવાહી થઈ છે. પોલીસે ઝડપાયેલા તમામ આરોપીઓને ઘી કાંટા મેટ્રો કોર્ટમાં રજૂ કર્યા હતા. કોર્ટમાં બંને પક્ષોની દલીલો બાદ 178 આરોપીઓને જામીન આપવામાં આવ્યા છે, જ્યારે ગેરકાયદે જુગાર નેટવર્કના મુખ્ય સૂત્રધાર ગણાતા 9 આરોપીઓના ચાર દિવસના પોલીસ રિમાન્ડ મંજૂર કરવામાં આવ્યા છે

SMCની કાર્યવાહી દરમિયાન ઝડપાયેલા ગામા પટેલ સહિતના મુખ્ય આરોપીઓને પાંચ પોલીસ બસોમાં કડક સુરક્ષા વ્યવસ્થા વચ્ચે ઘી કાંટા મેટ્રો કોર્ટમાં લાવવામાં આવ્યા હતા. પોલીસે કુલ 187 આરોપીઓને કોર્ટ સમક્ષ રજૂ કરીને મુખ્ય આરોપીઓના રિમાન્ડની માંગણી કરી હતી, જેથી સમગ્ર રેકેટ અંગે ઊંડાણપૂર્વક તપાસ કરી શકાય

કોર્ટે ગેરકાયદે જુગાર નેટવર્ક સાથે સંકળાયેલા 9 મુખ્ય આરોપીઓના ચાર દિવસના પોલીસ રિમાન્ડ  મંજૂર કર્યા છે. તેમાં ગોવિંદ પટેલ, સત્તાર વોરા, હુસેન સિપાઈ, લક્ષ્મણ પરમાર, દિનેશ ભાવસાર, કિશોર પઢિયાર, નારણ રાવલ, સલીમ મસુરી અને આનંદ ઠાકોરનો સમાવેશ થાય છે. પોલીસ હવે રિમાન્ડ દરમિયાન તેમની સઘન પૂછપરછ કરીને ફરાર સહ-આરોપીઓ અને સમગ્ર ગેરકાયદે નેટવર્ક અંગે વધુ માહિતી મેળવવાનો પ્રયાસ કરશે..

પાસમાં સામે આવ્યું છે કે મનપસંદ જીમખાનામાં ગોવાના કેસિનો જેવી વ્યવસ્થા ઉભી કરવામાં આવી હતી. અહીં જુગાર રમવા માટે ટેબલ દીઠ રૂ. 15 હજારથી 30 હજાર સુધીનું ભાડું વસૂલવામાં આવતું હતું. ઉપરાંત સભ્યપદ (મેમ્બરશીપ) માટે રૂ. 2 હજાર લેવામાં આવતા હતા. પોલીસે એવો પણ દાવો કર્યો છે કે નાણાંની લેવડદેવડ આંગડિયા પેઢી મારફતે કરવામાં આવતી હતી.

પોલીસનું કહેવું છે કે ચાર દિવસના રિમાન્ડ દરમિયાન મુખ્ય આરોપીઓની પૂછપરછના આધારે આ ગેરકાયદે જુગારધામ સાથે જોડાયેલા અન્ય લોકો સુધી પહોંચવાનો પ્રયાસ કરવામાં આવશે. સાથે જ નાણાંના વ્યવહાર, સંચાલન અને સમગ્ર રેકેટના મૂળ સુધી પહોંચવા માટે તપાસ વધુ તેજ કરવામાં આવશે.