છોટાઉદેપુર જિલ્લાના નસવાડી જૂથ ગ્રામપંચાયત વિસ્તારમાં છેલ્લા કેટલાક સમયથી ભૂંડોનો ત્રાસ વધી ગયો છે, જેનાથી સ્થાનિક લોકો ભારે પરેશાન છે. આ સમસ્યાના ઉકેલ માટે ગામના લોકો બેનરો હાથમાં રાખીને નસવાડી મામલતદાર કચેરી તેમજ તાલુકા પંચાયત કચેરી ખાતે પહોંચ્યા હતા અને અધિકારીઓને આવેદનપત્ર આપ્યું હતું.

ગ્રામજનોના જણાવ્યા અનુસાર, છેલ્લા 4 દિવસમાં જ ભૂંડોના કારણે બે મોટી ઘટનાઓ બની છે. આમાં ભૂંડે બે બાઈક ચાલકોને અડફેટે લીધા હતા, જેમાં એક બાઈક ચાલકનો હાથ અને બીજા બાઈક ચાલકનો પગ ભાંગી ગયો છે. આ ઉપરાંત, એક નાની બાળકીને પણ ભૂંડે કરડતા તેને સારવાર માટે હોસ્પિટલમાં દાખલ કરવામાં આવી છે.

ગામ લોકોનો આક્ષેપ છે કે, આ ગંભીર સમસ્યા અંગે નસવાડી ગ્રામ પંચાયતના તલાટી અને સરપંચને રજૂઆત કરવા છતાં તેઓ લોકોની વાત સાંભળતા નથી. પંચાયત દ્વારા કોઈ ઉકેલ ન લાવવામાં આવતા આખરે કંટાળીને ગ્રામજનોએ મામલતદાર અને તાલુકા પંચાયતમાં આવેદનપત્ર આપી ન્યાયની માંગ કરી છે.