સ્ટાર્ટઅપ શરૂ કરનારને સહાય ઉપરાંત માસીક ભથ્થુ, સીડફંડીંગ સહિત સુવિધાઓ
સ્ટાર્ટઅપ શરૂ કરનારને સહાય ઉપરાંત માસીક ભથ્થુ, સીડફંડીંગ સહિત સુવિધાઓ વિકસીત ગુજરાત ઓૈદ્યોગિક નીતિ-૨૦૨૬ હેઠળ પ્રોત્સાહનોમાં વધારો મહિલા સહ-સ્થાપક હશે તો દર મહિને રૂા. ૩૦ હજાર મળશેઃ ગુજરાત સરકારની મોટી જાહેરાત
ગાંધીનગરઃ તા.૧૬:ગુજરાતને સ્ટાર્ટઅપ અને ઇનોવેશનનું હબ બનાવવાના હેતુથી રાજ્ય સરકારે ‘વિકસિત ગુજરાત ઔદ્યોગિક નીતિ ૨૦૨૬' હેઠળ સ્ટાર્ટઅપ્સ માટે અનેક મહત્વપૂર્ણ પ્રોત્સાહનોની જાહેરાત કરી છે. નવી નીતિ અંતર્ગત હવે સ્ટાર્ટઅપ શરૂ કરનારા યુવાનોને માત્ર નાણાકીય સહાય જ નહીં પરંતુ માસિક ભથ્થું, સીડ ફંડિંગ અને વિશેષ પ્રોત્સાહન પણ મળશે.
રાજ્ય સરકારનું માનવું છે કે, આગામી વર્ષોમાં ટેક્રોલોજી, ગ્રીન એનર્જી, ફિનટેક, બાયોટેક, ડ્રોન અને રોબોટિક્સ જેવા ક્ષેત્રોમાં સ્ટાર્ટઅપ્સ ભારતના આર્થિક વિકાસમાં મહત્વપૂર્ણ ભૂમિકા ભજવશે. આ જ દિશામાં ગુજરાત સરકાર દ્વારા નવી નીતિ ઘડવામાં આવી છે, જેનાથી યુવા ઉદ્યોગસાહસિકોને પ્રોત્સાહન મળશે અને રાજ્યમાં રોજગારીની નવી તકો પણ ઊભી થશે.
નવી નીતિ મુજબ રાજ્યના સ્ટાર્ટઅપ્સને એક વર્ષ સુધી દર મહિને ૨૫ હજાર રૂપિયાનું નિર્વાહ ભથ્થું આપવામાં આવશે. આ સહાયનો હેતુ શરૂઆતના તબક્કામાં સ્ટાર્ટઅપ્સને નાણાકીય સ્થિરતા પૂરી પાડવાનો છે. વિશેષ વાત એ છે કે, જો કોઈ સ્ટાર્ટઅપમાં મહિલા સહ-સ્થાપક હશે તો તેને દર મહિને ૩૦ હજાર રૂપિયાનું ભથ્થું મળશે. સરકારનો આ નિર્ણય મહિલાઓને ઉદ્યોગસાહસિકતા તરફ વધુ પ્રોત્સાહિત કરશે તેવી આશા વ્યક્ત કરવામાં આવી રહી છે.
રાજ્ય સરકારે હાઈ-ટેક, ફિનટેક, બાયોટેક અને ગ્રીન ટેક્રોલોજી સાથે જોડાયેલા સ્ટાર્ટઅપ્સ માટે ખાસ જોગવાઈઓ પણ કરી છે. આવા સ્ટાર્ટઅપ્સને એક વર્ષ ઉપરાંત વધુ એક વર્ષ સુધી સહાય મેળવવાની તક આપવામાં આવશે. સરકારનું માનવું છે કે, ભવિષ્યની અર્થવ્યવસ્થા ટેક્રોલોજી અને સસ્ટેનેબલ ડેવલપમેન્ટ આધારિત હશે. તેથી આ ક્ષેત્રોમાં નવીનતા લાવનારા સ્ટાર્ટઅપ્સને વિશેષ પ્રોત્સાહન આપવામાં આવી રહ્યું છે.
સ્ટાર્ટઅપ્સ માટે સૌથી મોટો પડકાર શરૂઆતના તબક્કામાં ફંડિંગ મેળવવાનો હોય છે. આ પડકારને ધ્યાનમાં રાખીને નવી નીતિ હેઠળ સ્ટાર્ટઅપ્સને ૩૦ લાખ રૂપિયા સુધીનું સીડ સપોર્ટ આપવામાં આવશે. જ્યારે હાઈ-ઇમ્પેક્ટ અને નવીનતા આધારિત સ્ટાર્ટઅપ્સને ૪૦ લાખ રૂપિયા સુધીની સહાય આપવામાં આવશે. ઉપરાંત હાઈ-ટેક, ફિનટેક, ગ્રીન અને ડિસરપ્ટિવ સ્ટાર્ટઅપ્સ માટે વધારાના ૧૦ લાખ રૂપિયાના સહાય પેકેજની પણ જોગવાઈ કરવામાં આવી છે.
નવી ઔદ્યોગિક નીતિમાં મહિલા ઉદ્યોગસાહસિકોને વિશેષ મહત્વ આપવામાં આવ્યું છે. મહિલા સંચાલિત સ્ટાર્ટઅપ્સને વધારાની ૧ ટકા વ્યાજ સબસિડી આપવામાં આવશે. આ ઉપરાંત ઓફિસ અથવા કાર્યસ્થળના ભાડા પર ૭૫ ટકા સુધીની સહાય પણ આપવામાં આવશે, જેની મહત્તમ મર્યાદા દર વર્ષે ૩ લાખ રૂપિયા રહેશે. આ સહાય પાંચ વર્ષ સુધી આપવામાં આવશે. મહિલાઓ માટે એક્સિલરેશન પ્રોગ્રામ અને સ્કિલ ડેવલપમેન્ટ પહેલોને પણ સરકાર દ્વારા પ્રોત્સાહન આપવામાં આવશે.
અધિકારીઓના જણાવ્યા મુજબ નવી નીતિનો મુખ્ય હેતુ રાજ્યના સ્ટાર્ટઅપ ઇકોસિસ્ટમને વધુ મજબૂત બનાવવાનો છે. ખાસ કરીને સેમિકન્ડક્ટર, ગ્રીન એનર્જી, ડ્રોન, રોબોટિક્સ અને ડિજિટલ ટેક્રોલોજી જેવા ઉદ્વવતા ક્ષેત્રોમાં વધુ રોકાણ અને નવીનતા લાવવાનો પ્રયાસ કરવામાં આવશે. ગુજરાત પહેલાથી જ ઉદ્યોગ અને રોકાણ માટે દેશના અગ્રણી રાજ્યોમાં સામેલ છે. હવે નવી સ્ટાર્ટઅપ નીતિ દ્વારા રાજ્ય યુવા ઉદ્યોગસાહસિકો માટે વધુ અનુકૂળ વાતાવરણ ઊભું કરવા માંગે છે.
નવી ઔદ્યોગિક નીતિનો સૌથી મોટો ફાયદો રાજ્યના યુવાનોને થવાનો છે. નાણાકીય સહાય અને પ્રોત્સાહનોને કારણે વધુ યુવાનો સ્ટાર્ટઅપ શરૂ કરવા પ્રેરિત થશે. સાથે જ નવી કંપનીઓ ઉભી થવાથી રોજગારીની તકોમાં પણ વધારો થવાની શકયતા છે. ઉદ્યોગ જગતના નિષ્ણાતોનું માનવું છે કે, જો નીતિનો અસરકારક અમલ થશે તો ગુજરાત આગામી વર્ષોમાં દેશના સૌથી મજબૂત સ્ટાર્ટઅપ ઇકોસિસ્ટમ ધરાવતા રાજ્યોમાં સ્થાન મેળવી શકે છે.
(3:26 PM IST)
છેલ્લા 8 દિવસમાં સૌથી લોકપ્રિય 
