દક્ષિણ ગુજરાતના પ્રવાસન વિકાસ અને આદિવાસી વિસ્તારોના સર્વાંગી વિકાસ માટે રાજ્ય સરકાર દ્વારા મહત્વાકાંક્ષી માર્ગ પ્રોજેક્ટ હાથ ધરવામાં આવ્યો છે. સાપુતારાથી સ્ટેચ્યૂ ઓફ યુનિટી પ્રવાસન પથ પ્રોજેક્ટ અંતર્ગત તાપી જિલ્લાના બોરદા-સાતકાશી-શેરૂલ્લા માર્ગના પહોળાઈકરણ અને મજબૂતીકરણના કામનો પ્રારંભ કરવામાં આવ્યો છે. રૂ.45.42 કરોડના ખર્ચે તૈયાર થનારો આ માર્ગ વિસ્તારના વિકાસ માટે મહત્વપૂર્ણ સાબિત થશે.
પ્રોજેક્ટ અંતર્ગત 29.50 કિલોમીટર લાંબા માર્ગને હાલની 7.50 મીટરની પહોળાઈમાંથી વધારીને 10 મીટર પહોળો બનાવવામાં આવશે. માર્ગને ડબલ લેન વિથ પેવ્ડ શોલ્ડર ધોરણે વિકસાવવામાં આવશે, જેથી વાહનવ્યવહાર વધુ સરળ અને સુરક્ષિત બની શકે.
આ માર્ગ ડુંગરાળ અને વળાંકવાળા વિસ્તારમાંથી પસાર થતો હોવાથી વાહનચાલકોની સુરક્ષાને ધ્યાનમાં રાખી વિશેષ સુવિધાઓ ઊભી કરવામાં આવશે. તેમાં ‘કર્વ ઇમ્પ્રુવમેન્ટ’, પ્રોટેક્શન વોલ, ક્રેશ બેરિયર અને આધુનિક સાઇનેજની વ્યવસ્થા કરવામાં આવશે.
કર્વ ઇમ્પ્રુવમેન્ટ દ્વારા જોખમી અને આંધળા વળાંકોને વધુ સુરક્ષિત બનાવવામાં આવશે, જેથી સામેથી આવતા વાહનો સ્પષ્ટ રીતે દેખાઈ શકે. જ્યારે ક્રેશ બેરિયર વાહનોને ખીણમાં ખાબકતા અટકાવવામાં મદદરૂપ બનશે. રિફ્લેક્ટિવ સાઇનેજ રાત્રિના સમયે અને ધુમ્મસ જેવી પરિસ્થિતિમાં ચાલકોને માર્ગ અંગે પૂર્વ ચેતવણી આપશે.
આ માર્ગ Statue of Unity, Shabari Dham અને Saputara જેવા દક્ષિણ ગુજરાતના મહત્વના પ્રવાસન સ્થળોને વધુ સારી રીતે જોડશે. પરિણામે પ્રવાસીઓની અવરજવર વધશે અને સ્થાનિક પ્રવાસન ઉદ્યોગને નવી ગતિ મળશે.
નવા માર્ગથી સરહદી અને અંતરિયાળ વિસ્તારમાં આવેલા શેરૂલ્લા, બાવલી, ભટવાડા, જૂની કુઈલીવેલ, સાતકાશી, આમલપાડા, કુઈલીવેલ અને બોરદા સહિતના 8 ગામોની આશરે 12,780 જેટલી વસ્તીને સીધો લાભ મળશે.
આ ઉપરાંત સોનગઢ, ઉકાઈ અને સાગબારા તાલુકાઓને જોડતો મુખ્ય રાજ્ય ધોરીમાર્ગ હોવાથી સમગ્ર આદિવાસી પટ્ટાને પરોક્ષ રીતે પણ મોટો ફાયદો થશે. માર્ગ સુવિધા સુધરતાં શિક્ષણ, આરોગ્ય, વેપાર અને રોજગારીની તકોમાં વધારો થવાની સાથે સ્થાનિક અર્થતંત્રને પણ નવી મજબૂતી મળશે.

પ્રોજેક્ટ પૂર્ણ થયા બાદ પ્રવાસન ક્ષેત્રમાં રોકાણ અને સ્થાનિક રોજગારીની તકો વધવાની સંભાવના છે. ખાસ કરીને આદિવાસી વિસ્તારોમાં પરિવહન સુવિધા મજબૂત બનતાં કૃષિ, નાના વેપાર અને પ્રવાસન આધારિત રોજગારને પ્રોત્સાહન મળશે, જેનાથી સમગ્ર વિસ્તારના આર્થિક અને સામાજિક વિકાસને નવી દિશા મળશે.