અમદાવાદ: અમદાવાદ શહેરના વસ્ત્રાલ RTO ખાતે હવે ડ્રાઇવિંગ લાયસન્સ મેળવવાની પ્રક્રિયામાં એક ક્રાંતિકારી બદલાવ આવી રહ્યો છે. લાંબા સમયથી ચાલી આવતી એજન્ટોની ભલામણ અને અધિકારીઓની રૂબરૂ પરીક્ષાની પરંપરાગત પદ્ધતિ હવે ઈતિહાસ બનવા જઈ રહી છે. વસ્ત્રાલ RTO ખાતે દેશનો અત્યાધુનિક ‘AI આધારિત ઓટોમેટેડ ડ્રાઇવિંગ ટેસ્ટ ટ્રેક’ તૈયાર કરવામાં આવ્યો છે, જે આવનારા થોડા દિવસોમાં જ કાર્યરત થઈ જશે. હવે લાયસન્સ જોઈએ તો અધિકારીઓને નહીં, પણ ટેકનોલોજીને પાસ કરવી પડશે.

45 કેમેરા અને સેન્સરની અદ્રશ્ય નજર

આ સ્માર્ટ ટ્રેક પર ટેસ્ટ આપનાર દરેક વ્યક્તિના વાહનચલાવવાની એક-એક સેકન્ડ પર 45 થી વધુ હાઇ-રિઝોલ્યુશન કેમેરા બાજ નજર રાખશે. આ સિસ્ટમ ‘વીડિયો એનાલિટિકલ ટેકનોલોજી’થી સજ્જ છે, જે માત્ર તમારી ગતિ નહીં, પણ તમારા ટર્ન લેવાની રીત, ગાડી રિવર્સ કરવાની કુશળતા અને ટ્રાફિકના નિયમોનું પાલન જેવી તમામ ઝીણવટભરી બાબતોનું સચોટ મૂલ્યાંકન કરશે. સેન્સર આધારિત આ સિસ્ટમમાં ડ્રાઇવરની કોઈ પણ નાનકડી ભૂલ કમ્પ્યુટરની સ્ક્રીન પર તુરંત રેકોર્ડ થઈ જશે અને સેકન્ડોમાં જ ટેસ્ટનું પરિણામ નક્કી થઈ જશે.

એજન્ટો અને ભલામણ પ્રથા પર કાયમી બ્રેક

આ સિસ્ટમનો સૌથી મોટો ફાયદો એ છે કે તેમાં માનવીય હસ્તક્ષેપ શૂન્ય થઈ જશે. અત્યાર સુધી એજન્ટો મારફતે લાયસન્સ મેળવનારા લોકો હવે આ ટ્રેક પર કંઈ કરી શકશે નહીં. કમ્પ્યુટર સિસ્ટમ કોઈ પણ પક્ષપાત કે ઓળખાણ વગર માત્ર અને માત્ર વાહનચાલકની ક્ષમતાના આધારે જ તેને પાસ કે ફેલ જાહેર કરશે. આ પારદર્શિતાને કારણે માત્ર કુશળ ડ્રાઇવરો જ રસ્તા પર વાહન ચલાવવાનું લાયસન્સ મેળવી શકશે, જેનાથી ભવિષ્યમાં માર્ગ અકસ્માતોમાં પણ નોંધપાત્ર ઘટાડો થવાની પૂરી શક્યતા છે.

AI બનશે મુખ્ય પરીક્ષક

અત્યાર સુધી RTO અધિકારીઓ રૂબરૂ હાજર રહીને ડ્રાઇવિંગ તપાસતા હતા, જેમાં ક્યારેક માનવીય ક્ષતિઓ રહેવાની શક્યતા રહેતી હતી. હવે આર્ટિફિશિયલ ઇન્ટેલિજન્સ (AI) પોતે જ ‘મુખ્ય પરીક્ષક’ બનશે. જો ડ્રાઇવિંગમાં સહેજ પણ ભૂલ થઈ, તો સિસ્ટમ કોઈ પણ દયા વગર તમને ‘ફેઈલ’ જાહેર કરી દેશે. આ સિસ્ટમનું ઓપરેશન અને મેઇન્ટેનન્સ એક નવી સક્ષમ એજન્સી દ્વારા કરવામાં આવશે, જેથી ટેકનિકલ ખામીઓનું પણ કોઈ સ્થાન રહે નહીં.

અમદાવાદના પૂર્વ વિસ્તારમાં સ્થિત આ વસ્ત્રાલ RTO નો આ નવો ટ્રેક અન્ય તમામ RTO કચેરીઓ માટે એક મોડેલ બનશે. હવે લાયસન્સ મેળવવું એટલે માત્ર ફોર્મ ભરવું નહીં, પરંતુ ખરા અર્થમાં ડ્રાઇવિંગમાં નિપુણતા મેળવવી તે સાબિત થઈ જશે.