બોટાદ જિલ્લામાં ભાજપ દ્વારા પક્ષના શિસ્તનો ભંગ કરનારા અને પક્ષ વિરોધી પ્રવૃત્તિ કરનારા ચાર સક્રિય કાર્યકરો સામે લાલ આંખ કરવામાં આવી છે. બોટાદ જિલ્લા ભાજપ પ્રમુખ મયુર પટેલે તાત્કાલિક અસરથી આ ચાર સભ્યોને 6 વર્ષ માટે પક્ષમાંથી સસ્પેન્ડ કરવાનો આદેશ કર્યો છે. આ નિર્ણયને પગલે સ્થાનિક રાજકારણમાં ગરમાવો આવી ગયો છે.

બોટાદ નગરપાલિકાના વોર્ડ નંબર 9 ના પૂર્વ કોર્પોરેટર છત્રજીતભાઈ ધાધલએ પક્ષના આદેશ વિરુદ્ધ જઈને વોર્ડ નંબર 9 માં અપક્ષ ઉમેદવારી નોંધાવી હતી. ભાજપ હંમેશા શિસ્તબદ્ધ સંગઠન તરીકે ઓળખાય છે, ત્યારે પક્ષના સત્તાવાર ઉમેદવાર સામે જ બગાવત કરવી તેમને ભારે પડી છે. જિલ્લા સંગઠને આ બાબતને ગંભીરતાથી લઈને તેમને પક્ષના પ્રાથમિક સભ્યપદેથી મુક્ત કર્યા છે

બોટાદ શહેર જ નહીં, પરંતુ રાણપુર વિસ્તારમાં પણ ભાજપે કડક વલણ અપનાવ્યું છે. રાણપુરના વિજયભાઈ ઘાઘરેટીયાએ પણ પક્ષની વિચારધારાથી અલગ જઈને અપક્ષ તરીકે ફોર્મ ભરતા તેમને પણ 6 વર્ષ માટે ઘરભેગા કરવામાં આવ્યા છે. આ ઉપરાંત, રેણુકાબેન સવાણી અને જસુભાઈ સવાણી  સામે પણ પક્ષ વિરોધી પ્રવૃત્તિઓમાં સામેલ હોવાના પુરાવા મળતા જિલ્લા પ્રમુખ મયુર પટેલે તેમને સસ્પેન્ડ કર્યા છે.

ચૂંટણીના માહોલ વચ્ચે લેવાયેલો આ નિર્ણય અન્ય કાર્યકરો માટે પણ એક ચેતવણી સમાન છે. બોટાદ જિલ્લા ભાજપના આ આકરા વલણથી બળવાખોર નેતાઓ અને કાર્યકરોમાં ફફડાટ વ્યાપી ગયો છે. આગામી દિવસોમાં સંગઠન વધુ મજબૂતીથી ચૂંટણી મેદાનમાં ઉતરશે તેવા સંકેતો મળી રહ્યા છે.