અમદાવાદ: ગુજરાત પ્રદેશ કોંગ્રેસ સમિતિ દ્વારા આગામી સ્થાનિક સ્વરાજ્યની ચૂંટણીઓ-૨૦૨૬ માટે ઉમેદવારોની પસંદગી પ્રક્રિયા પૂર્ણ કરી કુલ ૨૪૩ ઉમેદવારોની વિગતવાર યાદી જાહેર કરવામાં આવી છે. “રાજીવ ગાંધી ભવન” ખાતેથી પ્રસિદ્ધ કરાયેલી આ યાદીમાં અનુભવી અને નવા ચહેરાઓ વચ્ચે સંતુલન જાળવવાનો પ્રયાસ કરવામાં આવ્યો છે.

મહાનગરપાલિકા મુજબ ઉમેદવારોની સંખ્યા:
કોંગ્રેસ દ્વારા જાહેર કરવામાં આવેલી આ યાદીમાં ગુજરાતની સાત મુખ્ય મહાનગરપાલિકાઓ અને મોરબી નગરપાલિકાના ઉમેદવારોનો સમાવેશ થાય છે:
 * અમદાવાદ મહાનગરપાલિકા: સૌથી વધુ ૮૧ ઉમેદવારોના નામ જાહેર કરવામાં આવ્યા છે.
 * સુરત મહાનગરપાલિકા: કુલ ૬૦ ઉમેદવારોને મેદાનમાં ઉતારવામાં આવ્યા છે.
 * વડોદરા મહાનગરપાલિકા: ૩૦ ઉમેદવારોના નામની જાહેરાત કરવામાં આવી છે.
 * ભાવનગર મહાનગરપાલિકા: ૨૫ ઉમેદવારોની પસંદગી કરવામાં આવી છે.
 * જામનગર મહાનગરપાલિકા: ૧૮ ઉમેદવારોના નામ સાથે યાદી પ્રસિદ્ધ કરાઈ છે.
 * રાજકોટ મહાનગરપાલિકા: ૨૫ ઉમેદવારોના નામોને મંજૂરી અપાઈ છે.
 * મોરબી નગરપાલિકા: ૪ ઉમેદવારોના નામ જાહેર કરાયા છે.
જામનગર અને ભાવનગરના મુખ્ય ચહેરાઓ

જામનગર મહાનગરપાલિકા માટે વોર્ડ નં. ૨ થી મહીપાલસિંહ અશોકસિંહ જાડેજા, વોર્ડ નં. ૩ થી ભાવેશભાઈ બાબુભાઈ પરમાર અને ભારદ્વાજ વિપુલભાઈ મહેતા જેવા નામ જાહેર થયા છે. જ્યારે ભાવનગરમાં મનિષાબેન કમલેશભાઈ ગોહિલ, કાન્તીભાઈ બી. ગોહીલ અને અબ્દુલ રહીમભાઈ અમીભાઈ કુરેશી જેવા સક્રિય કાર્યકરોને ટિકિટ આપવામાં આવી છે.

સુરત, વડોદરા અને અમદાવાદમાં મજબૂત દાવેદારી:
સુરતમાં પ્રતિમા બાબુલાલ પઢિયારી, આશાબેન વિનોદભાઈ સોનાવિયા અને બોની જગદીશભાઈ પટેલ જેવા ઉમેદવારો સાથે કોંગ્રેસે મોરચો સંભાળ્યો છે. વડોદરામાં કૃતિ નિશાંત રાવલ અને ધર્મિષ્ઠાબેન મહેન્દ્રભાઈ પરમારના નામની જાહેરાત કરવામાં આવી છે. અમદાવાદમાં ગોતા વોર્ડમાંથી તન્વીબેન દરજી, ચાંદલોડિયામાંથી પ્રદીપભાઈ પટેલ અને સાબરમતીમાંથી પુષ્પાબેન હરીશભાઈ વાઘેલા ચૂંટણી લડશે.

વિવિધ જ્ઞાતિ સમીકરણો પર ધ્યાન
કોંગ્રેસની આ યાદીમાં લઘુમતી સમુદાયના ઉમેદવારોને પણ પૂરતું પ્રતિનિધિત્વ આપવામાં આવ્યું છે. સુરતમાંથી મો. સોહેલ મો. અમીન શેખ અને રેહાના સઈદ સૈયદ જેવા ઉમેદવારો મુખ્ય છે. રાજકોટમાં રમેશભાઈ ઝુન્ઝા (ભરવાડ) અને ડૉ. રતિલાલ ડોબરિયા જેવા નામો સાથે પક્ષે ચૂંટણી જીતવાનો આત્મવિશ્વાસ વ્યક્ત કર્યો છે. આ યાદી સાથે જ તમામ શહેરોમાં રાજકીય માહોલ ગરમાયો છે અને ઉમેદવારોએ જનસંપર્કની કામગીરી શરૂ કરી દીધી છે.

સંપૂર્ણ યાદી જોવા માટે આ સાથે ની PDF ફાઇલ ડાઉનલોડ કરો...