અમદાવાદ:અમદાવાદ મ્યુનિસિપલ કોર્પોરેશનની આગામી ચૂંટણીને લઈને રાજકીય પક્ષોએ પોતાની રણનીતિ તેજ કરી દીધી છે. સૂત્રો દ્વારા મળતી માહિતી મુજબ, કોંગ્રેસે આ વખતે પ્રયોગો કરવાને બદલે પાયાના અને મજબૂત પૂર્વ કોર્પોરેટરોને રિપીટ કરવાનો નિર્ણય લીધો છે. કોંગ્રેસ હાઈકમાન્ડ દ્વારા શહેઝાદ ખાન પઠાણ, જગદીશ રાઠોડ, નીરવ બક્ષી અને રાજશ્રી કેસરી જેવા દિગ્ગજ ચહેરાઓની ટિકિટ લગભગ નિશ્ચિત માનવામાં આવી રહી છે.
કોંગ્રેસનો ‘રિપીટ’ કાર્ડ: વિશ્વાસુ ચહેરાઓ પર ભરોસો
શહેરમાં કોંગ્રેસના ગઢ ગણાતા વિસ્તારોમાં પક્ષ કોઈ પણ પ્રકારનું જોખમ લેવા માંગતું નથી. જે પૂર્વ કોર્પોરેટરોએ પોતાના વોર્ડમાં મજબૂત પકડ જમાવી છે અને લોકોની વચ્ચે રહીને કામ કર્યું છે, તેમને ફરીથી તક આપીને કોંગ્રેસે જીતનો વિશ્વાસ વ્યક્ત કર્યો છે. ખાસ કરીને લઘુમતી બહુલ વિસ્તારો અને દલિત પછાત વિસ્તારોમાં જૂના ચહેરાઓ જ પક્ષની નૈયા પાર ઉતારશે તેવી ગણતરી સેવવામાં આવી રહી છે.
ભાજપની નવી રણનીતિ: એક બેઠક પર ૧૨ દાવેદારો
સામે પક્ષે સત્તારૂઢ ભાજપે લોકશાહી ઢબે ઉમેદવારોની પસંદગી પ્રક્રિયા હાથ ધરી છે. ભાજપના આંતરિક સૂત્રો મુજબ, અમદાવાદના દરેક વોર્ડ દીઠ અંદાજે ૧૨ સંભવિત ઉમેદવારોના નામોની યાદી તૈયાર કરવામાં આવશે. આ યાદીમાંથી નિરીક્ષકો દ્વારા સ્ક્રુટિની કર્યા બાદ આખરી પેનલ નક્કી કરવામાં આવશે. ભાજપમાં ટિકિટ વાંચ્છુઓની લાંબી યાદી હોવાથી પક્ષ શિસ્ત અને કામગીરીના આધારે જ નિર્ણય લેશે.
વોર્ડ લેવલે રાજકીય ગરમાવો
ટિકિટોની વહેંચણીના સમાચાર વહેતા થતા જ સ્થાનિક કક્ષાએ કાર્યકરોમાં ભારે ઉત્સાહ જોવા મળી રહ્યો છે. એક તરફ કોંગ્રેસના જૂના નેતાઓ પ્રચારમાં જોતરાઈ ગયા છે, તો બીજી તરફ ભાજપના નવા ચહેરાઓ ટિકિટ મેળવવા માટે એડીચોટીનું જોર લગાવી રહ્યા છે. આગામી દિવસોમાં બંને પક્ષો દ્વારા સત્તાવાર યાદી જાહેર કરવામાં આવે તેવી શક્યતા છે.