અમદાવાદ:ગુજરાતમાં આગામી સમયમાં યોજાનારી સ્થાનિક સ્વરાજની ચૂંટણીને લઈને રાજકીય ગરમાવો તેજ બન્યો છે. આ ચૂંટણીમાં ભાજપને ટક્કર આપવા માટે કોંગ્રેસે પોતાની તૈયારીઓ આખરી ઓપ આપી દીધો છે. સૂત્રોના જણાવ્યા અનુસાર, કોંગ્રેસ આગામી ૬ અને ૭ એપ્રિલે રાજ્યની ૧૫ મહાનગરપાલિકાઓ માટે પોતાનું નવું અને આકર્ષક ‘ચૂંટણી મેનિફેસ્ટો’ (જાહેરનામું) લોન્ચ કરવા જઈ રહી છે.
મેનિફેસ્ટોમાં શું હશે ખાસ?
કોંગ્રેસના આ નવા મેનિફેસ્ટોમાં સ્થાનિક સમસ્યાઓ, નાગરિકોની સુવિધા, ભ્રષ્ટાચાર મુક્ત વહીવટ અને આધુનિક શહેરી વિકાસ પર વિશેષ ભાર મૂકવામાં આવ્યો હોવાની ચર્ચાઓ છે. પાર્ટી દ્વારા તૈયાર કરવામાં આવેલા આ દસ્તાવેજમાં સામાન્ય જનતાની રોજિંદી જરૂરિયાતોને પ્રાધાન્ય આપવામાં આવ્યું છે.
૧૫ મહાનગરોમાં એકસાથે કાર્યક્રમ
પાર્ટીના ઉચ્ચ સૂત્રોના મતે, આ મેનિફેસ્ટોનું લોન્ચિંગ ખૂબ જ આયોજનબદ્ધ રીતે કરવામાં આવશે. ૬ અને ૭ એપ્રિલ દરમિયાન રાજ્યની ૧૫ મહાનગરપાલિકાઓમાં એકસાથે આ લોન્ચિંગ કાર્યક્રમ યોજાશે, જેમાં સ્થાનિક નેતાઓ અને કાર્યકર્તાઓ ઉપસ્થિત રહીને જનતા સમક્ષ પાર્ટીના વિઝનને રજૂ કરશે.
આ નિર્ણય દ્વારા કોંગ્રેસ રાજ્યભરમાં એક સકારાત્મક સંદેશ આપવાની અને મતદારોને આકર્ષવાની કોશિશ કરી રહી છે. હવે જોવાનું એ રહેશે કે કોંગ્રેસનો આ ‘માસ્ટર પ્લાન’ મતદારોના મનને કેટલું જીતી શકે છે.