રાજકોટ : ગુજરાતના રાજકીય ઇતિહાસમાં અવારનવાર વિરોધ પક્ષના ઉમેદવારોના ફોર્મ ટેકનિકલ ખામીઓના કારણે રદ થવાના અનેક કિસ્‍સાઓ પ્રકાશમાં આવ્‍યા છે. આ ગંભીર સમસ્‍યાને જડમૂળથી ડામવા માટે કોંગ્રેસ પાર્ટીએ આગામી સ્‍થાનિક સ્‍વરાજ્‍યની ચૂંટણીઓ પૂર્વે એક સઘન એક્‍શન પ્‍લાન તૈયાર કર્યો છે. ઉમેદવારી પત્ર ભરવામાં સામાન્‍ય ભૂલ પણ ઉમેદવારને ચૂંટણીની રેસમાંથી બહાર કરી શકે છે, તે બાબતને ગંભીરતાથી લઈને કોંગ્રેસે હવે સિનિયર વકીલોની એક વિશેષ પેનલ મેદાને ઉતારવાનો નિર્ણય લીધો છે. વિવિધ ઓથેન્‍ટિક મીડિયા અહેવાલો અનુસાર, લોકસભા અને રાજ્‍યસભાની ચૂંટણીઓમાં જે સ્‍તરની કાનૂની તકેદારી રાખવામાં આવે છે, તેવી જ ગંભીરતા હવે મહાનગરપાલિકા અને પંચાયતની ચૂંટણીઓમાં પણ દાખવવામાં આવશે.

આ નવી કાનૂની રણનીતિ હેઠળ, કોંગ્રેસના સિનિયર એડવોકેટ્‍સની ટીમ પક્ષના નેતાઓ અને સંભવિત ઉમેદવારોને ઉમેદવારી પત્ર કઈ રીતે ભરવું તેની સઘન ટ્રેનિગ આપશે. ફોર્મ ભરતી વખતે કઈ કઈ કાનૂની અને ટેકનિકલ બાબતોનું ધ્‍યાન રાખવું, એફિડેવિટમાં કઈ વિગતો કાળજીપૂર્વક દર્શાવવી અને ફોર્મ ચકાસણી વખતે સત્તાધારી પક્ષના વાંધાઓનો કઈ રીતે કાનૂની સામનો કરવો, તે તમામ મુદ્દાઓને આ ટ્રેનિગમાં આવરી લેવામાં આવશે. કોંગ્રેસનું સ્‍પષ્ટ માનવું છે કે રાજકીય લડાઈ પહેલા કાનૂની લડાઈ જીતવી જરૂરી છે, તેથી ટેકનિકલ મોરચે સજ્જ થવું એ સમયની માંગ છે.

આ ઉપરાંત, પ્રદેશ નેતાગિરીએ કોઈ પણ સંજોગોમાં મતદાન પહેલાં હાર ન થાય તે માટે ઉમેદવારોને માનસિક રીતે મજબૂત કરવા પર પણ ભાર મૂક્‍યો છે. ગત ચૂંટણીઓમાં રાજકોટના વોર્ડ નંબર ૧ માં કોરા મેન્‍ડેટના છબરડાને કારણે ભાજપના ઉમેદવાર હિરેન ખીમાણિયાને મળેલા સીધા ફાયદામાંથી બોધપાઠ લઈને, કોંગ્રેસ હવે સંવેદનશીલ બેઠકો પર ડમી અને અપક્ષ ઉમેદવારોની ફોજ પણ તૈયાર રાખી રહી છે. જેથી જો કોઈ ઉમેદવાર દબાણ કે પ્રલોભનનો શિકાર બને અથવા ફોર્મમાં કોઈ ટેકનિકલ ક્ષતિ રહી જાય, તો પક્ષનો અન્‍ય સક્ષમ ઉમેદવાર ચૂંટણી જંગમાં મજબૂતાઈથી ટકી શકે અને પક્ષને નુકસાન ન થાય.