અરવલ્લી જિલ્લા પોલીસની લોકલ ક્રાઈમ બ્રાન્ચને મોટી સફળતા હાથ લાગી છે. મોડાસામાં બે મહિના પૂર્વે થયેલી સનસનાટીભરી લૂંટનો ભેદ ઉકેલી પોલીસે આંતરરાજ્ય લૂંટ ગેંગના એક સભ્યને ઝડપી લીધો છે. પકડાયેલા આરોપી મૂળ મધ્યપ્રદેશનો હોવાનું અને લૂંટેલા દાગીનાને ઓગાળીને વેચવાની પેરવીમાં હોવાનું બહાર આવ્યું છે.

મોડાસા પંથકમાં બે મહિના પહેલાં ત્રાટકેલી લૂંટારુ ટોળકીએ તરખાટ મચાવ્યો હતો. આ ઘટનામાં સંડોવાયેલી ગેંગને પકડવા એલસીબીની ટીમ સતત વોચમાં હતી. બાતમીના આધારે પોલીસે મધ્યપ્રદેશના વોન્ટેડ આરોપીને દબોચી લીધો હતો. પોલીસની પૂછપરછમાં જાણવા મળ્યું કે, તે આંતરરાજ્ય ગેંગનો સક્રિય સભ્ય છે, જે રાત્રિના સમયે બંધ મકાનો કે ચોક્કસ સ્થળોને નિશાન બનાવી લૂંટ ચલાવતા હતા.

પોલીસે આરોપી પાસેથી રૂપિયા 2.90 લાખની કિંમતના સોના-ચાંદીના દાગીના સહિતનો મુદ્દામાલ રિકવર કર્યો છે. પોલીસ તપાસમાં ચોંકાવનારો ખુલાસો થયો છે કે, આરોપી આ દાગીનાની ઓળખ છુપાવવા માટે તેને પીગળાવીને સોની બજારમાં વેચવાનો પ્લાન બનાવી રહ્યો હતો, પરંતુ તે પહેલાં જ પોલીસના સકંજામાં આવી ગયો હતો.

આ ગેંગમાં કુલ 6 સભ્યો હોવાનું સામે આવ્યું છે, જેમાંથી એકની ધરપકડ કરવામાં આવી છે, જ્યારે અન્ય 5 આરોપીઓ હાલ ફરાર છે. અરવલ્લી પોલીસે ફરાર આરોપીઓના સંભવિત રહેઠાણો અને મધ્યપ્રદેશના કનેક્શન પર તપાસ કેન્દ્રિત કરી છે. આ ગેંગ પકડાતા જિલ્લામાં અન્ય ચોરી અને લૂંટના ગુનાઓ ઉકેલાવાની પણ શક્યતા સેવાઈ રહી છે.