ગાંધીનગર:રાજ્ય સરકાર દ્વારા વહીવટી માળખામાં ફેરફાર કરતા આજે ૩ આઈએએસ અધિકારીઓની બદલીના આદેશ જારી કરવામાં આવ્યા છે. આ આદેશ અનુસાર ગાંધીનગર, જામનગર અને સુરેન્દ્રનગર જિલ્લામાં નવા કલેક્ટરોની નિમણૂક કરવામાં આવી છે. લાંબા સમયથી પ્રતિક્ષિત આ બદલીઓમાં અનુભવી અધિકારીઓને મહત્વની જવાબદારીઓ સોંપવામાં આવી છે.

પી.બી. પંડ્યા જામનગરના નવા કલેક્ટર:
૨૦૧૩ બેચના આઈએએસ અધિકારી પી.બી. પંડ્યા, જેઓ હાલમાં અમરેલીના જિલ્લા વિકાસ અધિકારી (ડીડીઓ) તરીકે ફરજ બજાવી રહ્યા છે, તેમને જામનગરના કલેક્ટર તરીકે નિયુક્ત કરવામાં આવ્યા છે. તેઓ ૩૧ માર્ચ ૨૦૨૬ના રોજ વર્તમાન કલેક્ટર કે.બી. ઠક્કરની નિવૃત્તિ બાદ પોતાનો કાર્યભાર સંભાળશે.

જી.એચ. સોલંકીને સુરેન્દ્રનગરની જવાબદારી:
૨૦૧૪ બેચના આઈએએસ અધિકારી જી.એચ. સોલંકી, જેઓ હાલમાં નડિયાદ મ્યુનિસિપલ કમિશનર તરીકે કાર્યરત છે, તેમને સુરેન્દ્રનગરના કલેક્ટર તરીકે નિમણૂક આપવામાં આવી છે. આ નિમણૂક સાથે સુરેન્દ્રનગરના કલેક્ટરના ચાર્જમાં રહેલા આઈએએસ અધિકારી શ્રીમતી કે.એસ. યાજ્ઞિકને તે ચાર્જમાંથી મુક્ત કરવામાં આવ્યા છે.

રવિન્દ્ર ધર્મેશ્વર ખટાલે ગાંધીનગરના કલેક્ટર:
૨૦૧૬ બેચના આઈએએસ અધિકારી રવિન્દ્ર ધર્મેશ્વર ખટાલે, જેઓ હાલમાં મહેસાણા મ્યુનિસિપલ કમિશનર તરીકે સેવા આપી રહ્યા છે, તેમને રાજ્યના પાટનગર ગાંધીનગરના કલેક્ટર તરીકેની મહત્વની જવાબદારી સોંપાઈ છે. આ સાથે જ ગાંધીનગર કલેક્ટરના ચાર્જમાં રહેલા આઈએએસ અધિકારી જે.એન. વાઘેલાને પણ ચાર્જમાંથી મુક્ત કરવામાં આવ્યા છે.

આ બદલીઓના આદેશથી રાજ્યના વહીવટી તંત્રમાં ગતિશીલતા લાવવાનો પ્રયાસ કરવામાં આવ્યો છે. નિમણૂક પામેલા તમામ અધિકારીઓને તાત્કાલિક અસરથી પોતાની નવી જગ્યાએ હાજર થવા માટે સૂચના આપવામાં આવી છે.