દાહોદ:વડાપ્રધાન નરેન્દ્રભાઈ મોદીના 'વંચિતોને વરિયતા'ના મંત્રને ચરિતાર્થ કરતા મુખ્યમંત્રી ભુપેન્દ્રભાઈ પટેલે રાજ્યના પૂર્વ પટ્ટીના બે અગત્યના આદિવાસી જિલ્લાઓ પંચમહાલ અને દાહોદમાં રૂ. 1100 કરોડના વિકાસ પ્રકલ્પોના લોકાર્પણ અને ખાતમુહૂર્ત સંપન્ન કર્યા હતા. પંચમહાલ જિલ્લામાં રૂ. 732 કરોડના 112 કામો અને દાહોદ જિલ્લામાં રૂ. 367 કરોડના 1200થી વધુ વિકાસ કામોની ભેટ આદિજાતિ પરિવારોને ધરવામાં આવી છે. આ કાર્યક્રમ દ્વારા રાજ્ય સરકારે આદિવાસી વિસ્તારોના સર્વગ્રાહી વિકાસ માટે પોતાની મક્કમતા દર્શાવી છે.
મુખ્યમંત્રી ભુપેન્દ્રભાઈ પટેલે પંચમહાલ જિલ્લાના શહેરા, ગોધરા, કાલોલ અને ઘોઘંબા તાલુકાના 79 ગામો માટે આશીર્વાદ સમાન રૂ. 406 કરોડની ઉદવહન સિંચાઈ પાઇપલાઇન યોજનાનું લોકાર્પણ કર્યું હતું. આ યોજના અંતર્ગત પાનમ જળાશયમાંથી 236 ફૂટની ઊંચાઈએ પાણી લિફ્ટ કરી 205 કિલોમીટર લાંબી વિતરણ પાઇપલાઇન દ્વારા 130 તળાવો ભરવામાં આવશે. જેના પરિણામે અંદાજે 86 હજાર એકર વિસ્તારને સિંચાઈનો સીધો લાભ મળતો થશે અને ખેડૂતોની આર્થિક સ્થિતિમાં મોટો સુધારો આવશે. મુખ્યમંત્રીએ જણાવ્યું હતું કે અંબાજીથી ઉમરગામ સુધીના આદિવાસી પટ્ટામાં અત્યાર સુધી રૂ. 3160 કરોડના ખર્ચે 11 યોજનાઓ દ્વારા 2.23 લાખ એકર જમીનને સિંચાઈ હેઠળ આવરી લેવામાં આવી છે.
વિકસિત ગુજરાતના નિર્માણમાં આદિજાતિ વિસ્તારોના ફાળા અંગે વાત કરતા ભુપેન્દ્રભાઈ પટેલે જણાવ્યું કે, આ વર્ષના રૂ. 4 લાખ કરોડના ઐતિહાસિક બજેટમાં આદિવાસી વિસ્તારોમાં લિફ્ટ ઇરિગેશન માટે રૂ. 485 કરોડની વિશેષ જોગવાઈ કરવામાં આવી છે. આ ઉપરાંત છોટાઉદેપુર, દાહોદ અને પંચમહાલના 18 તાલુકાઓના 51,480 હેક્ટર વિસ્તારને નર્મદા આધારિત સિંચાઈ સુવિધા પૂરી પાડવાનું આયોજન છે. તેમણે એસ્પિરેશનલ ડિસ્ટ્રિક્ટ દાહોદને વિકસિત ભારત માટે 'ઇન્સ્પિરેશનલ ડિસ્ટ્રિક્ટ' બનવા માટે આહવાન કર્યું હતું. આ વિકાસ કામોમાં મુખ્યત્વે આરોગ્ય, શિક્ષણ, રોડ નેટવર્ક અને પીવાના પાણીની સુવિધાઓ પર ભાર મૂકવામાં આવ્યો છે.
આ પ્રસંગે મંત્રી અર્જુનભાઈ મોઢવાડિયા, રાજ્ય મંત્રી રમેશભાઈ કટારા, પી. સી. બરંડા, સાંસદ રાજપાલસિંહ જાદવ અને જશવંતસિંહ ભાભોર સહિતના મહાનુભાવો ઉપસ્થિત રહ્યા હતા. કાર્યક્રમમાં રાજ્યસભા સાંસદ ડૉ. જસવંતસિંહ પરમાર, સ્થાનિક ધારાસભ્યો અને વહીવટી તંત્રના ઉચ્ચ અધિકારીઓ સાથે વિશાળ સંખ્યામાં આદિજાતિ પરિવારો સહભાગી થયા હતા. પંચમહાલ અને દાહોદ જિલ્લામાં થયેલા આ વિકાસ કામોથી પૂર્વ પટ્ટીના જનજીવનમાં નવી ક્રાંતિ આવશે તેવી આશા વ્યક્ત કરવામાં આવી છે.