સુરત: ડાયમંડ સિટી સુરતમાં એક એવી ઘટના બની જે સાંભળીને કોઈપણના હોશ ઉડી જાય. શહેરના પુણાગામ વિસ્તારમાં આવેલી નિજાનંદ સોસાયટીના એક પરિવારે અજાણતામાં પોતાની મહેનતની કમાણીના ૨ લાખ રૂપિયા પૂજાની સામગ્રી સમજીને કેનાલમાં પધરાવી દીધા હતા. જોકે, સુરત ફાયર બ્રિગેડની પ્રમાણિકતા અને અદભૂત કામગીરીને કારણે આ રકમ સુરક્ષિત રીતે પરિવારને પરત મળી છે.

ભૂલથી તિજોરી ખાલી થઈ ગઈ!

ઘટનાની વિગત એવી છે કે પરિવારમાં ધાર્મિક વિધિ બાદ પૂજાના ફૂલો અને અન્ય સામગ્રી તિજોરી પાસે રાખવામાં આવી હતી. શનિવારે જ્યારે આ સામગ્રી એકત્ર કરવામાં આવી, ત્યારે તિજોરીમાં રાખેલા ૫૦૦ના દરની નોટોના ૪ બંડલ (કુલ ૨ લાખ રૂપિયા) પણ ભૂલથી એ જ પ્લાસ્ટિકની થેલીમાં મુકાઈ ગયા હતા. પરિવારને આ વાતનો અંદાજ સુદ્ધાં નહોતો અને તેમણે અમેઝિયા ટાવર પાસે આવેલી કેનાલમાં જઈને આ થેલી પધરાવી દીધી હતી.

ફાયર બ્રિગેડનું 'મિલિયન ડોલર' રેસ્ક્યુ ઓપરેશન

પરિવાર જ્યારે ઘરે પહોંચ્યો અને તિજોરી તપાસી ત્યારે તેમના પગ નીચેથી જમીન સરકી ગઈ હતી. ૨ લાખ રૂપિયા ગાયબ જોઈને તેમને તુરંત સમજાયું કે રૂપિયા કેનાલમાં પધરાવી દેવાયા છે. તાત્કાલિક ડુંભાલ ફાયર સ્ટેશનને જાણ કરવામાં આવતા ફાયર માર્શલોની ટીમ ઘટનાસ્થળે દોડી ગઈ હતી. કેનાલમાં પાણીનો પ્રવાહ હોવા છતાં, જવાનોએ જીવના જોખમે પાણીમાં ડૂબકીઓ મારી સર્ચ ઓપરેશન શરૂ કર્યું હતું. ભારે જહેમત બાદ કેનાલના તળિયે કાદવમાંથી એ પ્લાસ્ટિકની થેલી મળી આવી હતી, જેમાં ૨ લાખ રૂપિયા અકબંધ હતા.

પરિવારની આંખોમાં હરખના આંસુ

પંચોની હાજરીમાં જ્યારે ફાયર વિભાગે આ રકમ પરિવારને સુપ્રત કરી ત્યારે પરિવારની ખુશીનો પાર રહ્યો નહોતો. સુરત ફાયર બ્રિગેડની આ ત્વરિત અને નિષ્ઠાવાન કામગીરીના આખા શહેરમાં વખાણ થઈ રહ્યા છે. લોકો કહી રહ્યા છે કે નસીબ સારા હોય અને તંત્ર આટલું સતર્ક હોય તો ડૂબેલા નાણાં પણ પાછા મળી શકે છે.