અમદાવાદ: અમદાવાદમાં એન્ફોર્સમેન્ટ ડિરેક્ટોરેટ (ED) એ આર્થિક ગુનાખોરીના એક એવા મસમોટા નેટવર્કનો પર્દાફાશ કર્યો છે, જેણે તપાસનીશ એજન્સીઓના પણ હોશ ઉડાવી દીધા છે. તપાસમાં બહાર આવ્યું છે કે, મહિને માંડ ૧૦ થી ૧૨ હજાર રૂપિયા કમાતો એક સામાન્ય રેપિડો ચાલક પ્રદીપ ઓડ અજાણતા જ ૩૦૦ કરોડ રૂપિયાના ટ્રાન્ઝેક્શનનો માધ્યમ બની ગયો હતો. માત્ર ૨૫ હજાર રૂપિયાની લાલચમાં તેણે પોતાનું બેંક એકાઉન્ટ કિરણ પરમાર ઉર્ફે લાલા નામના શખ્સને ભાડે આપ્યું હતું. આ એકાઉન્ટ અને તેના પાન-આધાર કાર્ડના આધારે 'પ્રદીપ એન્ટરપ્રાઇઝ' જેવી બોગસ પેઢીઓ ઊભી કરી કરોડો રૂપિયાની હેરાફેરી કરવામાં આવી હતી. આ મામલે હવે ED દ્વારા અમદાવાદ ક્રાઈમ બ્રાંચમાં વિધિવત ફરિયાદ નોંધાવવામાં આવતા હડકંપ મચી ગયો છે.

આ હવાલા કૌભાંડની કાર્યપદ્ધતિ અત્યંત ચોંકાવનારી છે. 'પ્રદીપ એન્ટરપ્રાઇઝ', 'કમલેશ ટ્રેડિંગ' અને 'રોનક ટ્રેડર્સ' જેવી કંપનીઓ માત્ર કાગળ પર જ અસ્તિત્વ ધરાવતી હતી અને વાસ્તવમાં એક પણ રૂપિયાનો વેપાર કરતી નહોતી. તેમ છતાં, વર્ષ ૨૦૨૪માં ખોલવામાં આવેલા આ ખાતાઓમાં ટૂંકા ગાળામાં ૫૫૦ કરોડ રૂપિયાની એન્ટ્રીઓ પડી હતી. તપાસમાં ખૂલ્યું છે કે આ નાણાં ઓનલાઇન ક્રિકેટ સટ્ટાબેટિંગ અને શેરબજારમાં ગેરકાયદેસર રીતે મેળવેલી કમાણી હતી, જેને સિસ્ટમમાં ઘુસાડવા માટે 'લેયરિંગ' કરવામાં આવતું હતું. શેરબજારમાં તો હદ થઈ ગઈ જ્યારે એક શંકાસ્પદ કંપનીના શેરમાં માત્ર ૧૨ મહિનામાં ૧૦,૦૦૦ ટકાનો તોતિંગ ઉછાળો લાવીને રોકાણકારોને છેતરવાનો ખેલ પાડવામાં આવ્યો હતો, જેને પગલે સેબી (SEBI) એ પણ તપાસનો ગાળિયો કસ્યો છે.

EDની ઊંડી તપાસમાં આ કૌભાંડના છેડા ગાંધીધામ સુધી પહોંચ્યા છે. હવાલા મારફતે મેળવેલા નાણાંનો ઉપયોગ ગાંધીધામના બિઝનેસમેન આદિત્ય ઝુલાએ પોતાના અંગત મોજશોખ અને ભવ્ય લગ્ન સમારોહના ખર્ચ માટે કર્યો હોવાનું સામે આવ્યું છે. એટલું જ નહીં, કાળા નાણાંને કાયદેસરનું સ્વરૂપ આપવા માટે પેની સ્ટોક્સમાં હેરાફેરી કરીને જુદી જુદી કંપનીઓમાં ૮૦.૫૦ કરોડ, ૫૨.૧૧ કરોડ અને ૨૨.૮૬ કરોડ રૂપિયા જેવી માતબર રકમો ટ્રાન્સફર કરવામાં આવી હતી. આ ગેમમાં 'ઈમ્પેક્ટ ગુરુ' જેવી સંસ્થાઓમાં ડોનેશનના નામે પણ નાણાં સગેવગે કરવાનો કારસો રચાયો હતો, જેની અત્યારે ઝીણવટભરી તપાસ ચાલી રહી છે.

આ સમગ્ર કૌભાંડના મુખ્ય સૂત્રધાર કિરણ પરમાર ઉર્ફે લાલા સહિત મહાદેવ, જુગલ, રવિ અને જીવરાજ સામે EDએ ગુનો નોંધવાની કડક ભલામણ કરી છે. આ કિસ્સો લાલબત્તી સમાન છે કે કેવી રીતે સફેદપોશ ગુનેગારો ગરીબ લોકોના દસ્તાવેજોનો દુરુપયોગ કરી અબજો રૂપિયાનું કૌભાંડ આચરે છે. સામાન્ય નાગરિકોને ચેતવણી આપવામાં આવી છે કે મામૂલી રકમ માટે પોતાના બેંક એકાઉન્ટ કે ઓળખના પુરાવા કોઈને પણ આપવા નહીં, અન્યથા અજાણતા જ જેલના સળિયા પાછળ જવાનો વારો આવી શકે છે. હજુ પણ આ કેસમાં અન્ય મોટા માથાઓની સંડોવણી બહાર આવવાની પૂરેપૂરી શક્યતા છે.