અમદાવાદ,તા.૨૩: ગુજરાત હાઈકોર્ટે એક પિતાની હિબસ-કોર્પ્‍સ પિટિશન ડિસમિસ કરી હતી અને કહ્યું હતું કે તેમની ૧૮ વર્ષીય દીકરીએ પોતાની મરજીથી લગ્ન કર્યા છે અને કાયદાકીય લ્લષ્ટિએ તેને પોતાનો જીવનસાથી પસંદ કરવાની છૂટ છે.

પિતાએ અરજીમાં જણાવ્‍યું હતું કે તેમની દીકરીને એક પુરુષે ગેરકાયદે પોતાની સાથે રાખી છે. જોકે દીકરીએ પરિવારની સંમતિ વિના પોતાની મરજીના પુરુષ સાથે લગ્ન કર્યા હતા. કોર્ટે આ મામલે નોંધ્‍યું હતું કે અરજદારની દીકરીને પૂરતી સુરક્ષા સાથે કોર્ટમાં બોલાવવામા આવી હતી અને તેણે જણાવ્‍યું હતું કે તેણે પોતાની ઈચ્‍છાથી આ પુરુષ સાથે લગ્ન કર્યા છે. યુવતીએ કોઈપણ પ્રકારના દબાણનો ઈનકાર કર્યો હતો. આ સમયે તેનાં માતા-પિતા પણ હાજર હતા.

કોર્ટે એમ પણ નોંધ્‍યું કે અરજદાર પિતા તેમનાં પત્‍ની અને તેમની દીકરી સાથે વાતચીત કરી હતી, પરંતુ તેમની વચ્‍ચેનો મતભેદ ઉકેલી શકાયો ન હતો અને પિતા દીકરીને માફ કરવા તૈયાર ન હતા. દીકરીએ પણ સાફ કહ્યું હતું કે તે તેનાં પતિ સાથે જ રહેવા માગે છે. કોર્ટે પિતાની અરજીને ડિસમિસ કરી હતી અને ૧૮ વર્ષની દીકરી ૧૮ વર્ષની થઈ છે અને પોતાની મરજીથી પોતાનું લગ્નજીવન શરૂ કરી રહી છે.