વડોદરા: કહેવાતા સ્માર્ટ સિટી વડોદરામાં રસ્તાઓની હાલત એટલી હદે બિસ્માર બની છે કે હવે જનતા અને વિપક્ષનો રોષ સાતમા આસમાને પહોંચ્યો છે. શહેરના વોર્ડ નંબર ૧૨માં કોંગ્રેસના એક કાર્યકરે મ્યુનિસિપલ કોર્પોરેશનના અધિકારીઓ અને શાસકોની ઊંઘ ઉડાડવા માટે એક એવી અનોખી ઇનામી જાહેરાત કરી છે, જેણે આખા વડોદરામાં કુતૂહલ જગાડ્યું છે.
કાર બની 'વિરોધનું હથિયાર'
વોર્ડ નંબર ૧૨ના કોંગ્રેસ કાર્યકરે પોતાની કારને જ વિરોધ પ્રદર્શનનું સાધન બનાવી દીધું છે. તેણે કાર પર ઠેર-ઠેર તૂટેલા રસ્તાઓ, ખુલ્લી ગટરો અને થીગડા મારેલા પેચવર્ક વાળા રસ્તાઓના મોટા ફોટા અને બેનરો લગાવ્યા છે. આ કાર શહેરના રસ્તાઓ પર ફેરવીને તે તંત્રની નિષ્ફળતાનો પ્રચાર કરી રહ્યો છે.
'મને વિશ્વાસ છે કે મારે ઇનામ આપવું જ નહીં પડે'
કોંગ્રેસ કાર્યકરે આક્રમક કટાક્ષ કરતા જાહેર કર્યું છે કે, જો વોર્ડ નં. ૧૨માં કોઈપણ વ્યક્તિ તેને ૧ થી ૧.૫ કિલોમીટર સુધીનો એવો રસ્તો બતાવે કે જેના પર એક પણ ખાડો કે પેચવર્ક ન હોય, તો તેને ૧,૦૦૦ રૂપિયા રોકડ ઇનામ આપવામાં આવશે. કાર્યકરે ઉમેર્યું કે, "મને વડોદરા કોર્પોરેશનના હોદ્દેદારોના ભ્રષ્ટાચાર અને કામચોરી પર એટલો અતૂટ વિશ્વાસ છે કે મારો રૂપિયો કોઈ લઈ જઈ શકશે નહીં, કારણ કે આખા વોર્ડમાં એક પણ રસ્તો અકબંધ રહ્યો જ નથી."
જનતાના સ્વાસ્થ્ય અને શહેરની આબરૂનો સવાલ
માત્ર મજાક નહીં, પણ ગંભીર મુદ્દાઓ ઉઠાવતા આ કાર્યકરે જણાવ્યું હતું કે:
•    સ્વાસ્થ્યનું જોખમ: ઉબડખાબડ રસ્તાઓને કારણે વાહનચાલકો કમર અને મણકાની ગંભીર બીમારીઓનો ભોગ બની રહ્યા છે.
•    અકસ્માતનો ભય: ગટરના ખુલ્લા ઢાંકણા અને ઉંડા ખાડાઓ ટુ-વ્હીલર ચાલકો માટે મોતના કૂવા સમાન સાબિત થઈ રહ્યા છે.
•    વૈશ્વિક છબી: વડોદરા જ્યારે આંતરરાષ્ટ્રીય સ્તરે ઓળખ ધરાવે છે, ત્યારે વિદેશી મહેમાનો સામે આવા રસ્તાઓ શહેરની ગરિમા લજવે છે.
જાગૃત થવા આહ્વાન
કાર્યકરે જનતાને પણ અપીલ કરી છે કે જો હજુ પણ મૌન રહેશે તો તંત્ર આમ જ ટેક્સના નાણાં ખાડાઓમાં હોમતું રહેશે. તેણે કોર્પોરેશન પાસે પેચવર્કને બદલે ગુણવત્તાયુક્ત નવા રસ્તા બનાવવાની માંગ કરી છે. હવે જોવાનું એ રહે છે કે આ '૧,૦૦૦ રૂપિયાનું ઇનામ' લેવા માટે કોઈ ભાગ્યશાળી વડોદરાવાસી સારો રસ્તો શોધી શકે છે કે નહીં!