વડોદરા: ગાયકવાડી નગરી વડોદરાના શાહી ઠાઠ અને મહેમાનગતિના કિસ્સાઓ વિશ્વભરમાં જાણીતા છે, ત્યારે સોશિયલ મીડિયા પર ૧૨૯ વર્ષ જૂનું એક ‘શાહી મેનૂ’ વાયરલ થઈ રહ્યું છે. આ મેનૂ ૩૧ જાન્યુઆરી, ૧૮૯૭ના રોજ વડોદરાના લક્ષ્મી વિલાસ પેલેસમાં આયોજિત એક ભવ્ય રાત્રિભોજનનું છે. વડોદરાના મહારાજાએ ગ્વાલિયરના મહારાજાના સ્વાગતમાં ખાસ ફ્રેન્ચ વાનગીઓની આ દાવાત ગોઠવી હતી, જેની વિગતો જોઈને આજના સમયના લોકોની આંખો પણ ફાટી ગઈ છે.
યુરોપિયન શૈલીની વાનગીઓનું આકર્ષણ
ઇતિહાસકાર નેહા વિરમાણીએ સોશિયલ મીડિયા પર આ મેનૂની તસવીર શેર કરી છે. આ મેનૂમાં મોટાભાગની વાનગીઓના નામ ફ્રેન્ચ ભાષામાં લખાયેલા છે, જે તે સમયના રાજવી પરિવારોની આધુનિક અને વૈશ્વિક પસંદગી દર્શાવે છે. વાયરલ થયેલા આ ઐતિહાસિક મેનૂમાં નીચે મુજબની ખાસ વાનગીઓનો સમાવેશ થતો હતો:
 * Iotage d'Amandes: બદામમાંથી બનેલું સ્વાદિષ્ટ કસ્ટર્ડ.
 * Crème de Volaille truffée: ટ્રફલ્સ (એક પ્રકારની મોંઘી ફૂગ) સાથે તૈયાર કરેલું મલાઈદાર ચિકન સૂપ.
 * Poisson braisé sauce mayonnaise: મેયોનીઝ સોસ સાથે પકવેલી ખાસ માછલી.
 * Selle de perdreau rôtie aux petits pois: તાજા વટાણા સાથે શેકેલું તેતરનું માંસ.
 * Curry de Macédoine de légumes et riz: શાકભાજી અને ચોખાની ખાસ કરી.
 * Glace de Pistachio: અંતમાં મીઠાઈ તરીકે પિસ્તા આઈસ્ક્રીમ.
શાહી ઠાઠનો જીવંત પુરાવો
નેહા વિરમાણીના જણાવ્યા અનુસાર, આ અસલી મેનૂ કાર્ડ હાલમાં અમેરિકાના એક આર્કાઇવમાં સુરક્ષિત રીતે સંગ્રહિત કરવામાં આવ્યું છે. મેનૂ કાર્ડ પર ૩૧ જાન્યુઆરી, ૧૮૯૭ની તારીખ અને ગુજરાતના વડોદરા સ્થિત લક્ષ્મી વિલાસ પેલેસનું નામ સ્પષ્ટ જોઈ શકાય છે. આ તસવીર વાયરલ થયા બાદ લોકો વિવિધ પ્રતિક્રિયાઓ આપી રહ્યા છે. કેટલાક યુઝર્સે લખ્યું છે કે ૧૨૯ વર્ષ પહેલા આ પ્રકારની હાઈ-પ્રોફાઈલ મહેમાનગતિ ખરેખર અકલ્પનીય છે, તો કોઈએ તેને ભારતીય અને પશ્ચિમી સંસ્કૃતિના અનોખા મિલન તરીકે ગણાવ્યું છે.
ઇતિહાસકારો માને છે કે તે સમયના રાજવી પરિવારોમાં વિદેશી મહેમાનો અથવા અન્ય રજવાડાઓના રાજાઓને પ્રભાવિત કરવા માટે આ પ્રકારની યુરોપિયન શૈલીની વાનગીઓ પીરસવાનો ટ્રેન્ડ હતો. વડોદરાના મહારાજા દ્વારા ગ્વાલિયરના મહારાજા માટે આયોજિત આ ડિનર માત્ર જમણવાર નહીં, પરંતુ સત્તા અને શિષ્ટાચારનું પ્રદર્શન પણ હતું.