અમદાવાદ: અમદાવાદ શહેરને નશામુક્ત બનાવવા માટે પોલીસ દ્વારા ચલાવવામાં આવી રહેલી 'ઝીરો ટોલરન્સ' નીતિ હેઠળ ક્રાઈમ બ્રાન્ચે એક મોટી સફળતા હાંસલ કરી છે. નારોલ સર્કલ પાસે પોલીસે ફિલ્મી ઢબે ટ્રેપ ગોઠવીને ડુંગળીની થેલીઓની પાછળ છુપાવેલો ૪૦૬ કિલો અને ૩૫૦ ગ્રામ ગાંજાનો જંગી જથ્થો પકડી પાડ્યો છે. આ કાર્યવાહીથી ડ્રગ્સ માફિયાઓમાં ભારે ફફડાટ ફેલાઈ ગયો છે.
બાતમીના આધારે વોચ અને વાહનની તપાસ
અમદાવાદ ક્રાઈમ બ્રાન્ચને ચોક્કસ માહિતી મળી હતી કે મહારાષ્ટ્ર તરફથી એક પિક-અપ વાન નશીલા પદાર્થો ભરીને અમદાવાદમાં પ્રવેશવાની છે. આ બાતમીના આધારે નારોલ સર્કલ પાસે પોલીસની ટીમે વોચ ગોઠવી હતી. શંકાસ્પદ વાહન આવતા જ તેને રોકવામાં આવ્યું હતું. ઉપરથી જોતા વાહનમાં ડુંગળીની થેલીઓ અને બોક્સ ભરેલા દેખાતા હતા, પરંતુ જ્યારે પોલીસે ઊંડાણપૂર્વક તપાસ કરી ત્યારે ડુંગળીના જથ્થાની નીચે છુપાવેલા ગાંજાના પેકેટો મળી આવ્યા હતા.
મહારાષ્ટ્રના બે શખ્સોની ધરપકડ અને 'દીપક' કનેક્શન
પોલીસે આ મામલે મહારાષ્ટ્રના રહેવાસી શાંતારામ પાવરા અને સાગર પાવરાની ધરપકડ કરી છે. પ્રાથમિક પૂછપરછમાં જાણવા મળ્યું છે કે આ બંને આરોપીઓ 'દીપક' નામના શખ્સના કહેવાથી આ જથ્થો અમદાવાદ લાવ્યા હતા. આ માલ પહોંચાડવા બદલ તેમને ૫૦ હજાર રૂપિયાની લાલચ આપવામાં આવી હતી. આ ટોળકીએ અગાઉ ૮-૧૦ મહિના પહેલા પણ અમદાવાદમાં ગાંજાનો જથ્થો સપ્લાય કર્યો હોવાની કબૂલાત કરી છે.
પોલીસની તપાસનો ધમધમાટ
એસીપી (ક્રાઈમ) ભરત પટેલે જણાવ્યું હતું કે, આ ગાંજાની ગુણવત્તા સામાન્ય રીતે ઓરિસ્સાથી આવતા ગાંજા કરતા અલગ છે, જે સૂચવે છે કે આ કોઈ નવું નેટવર્ક હોઈ શકે છે. પકડાયેલા આરોપીઓના ફોન સ્વિચ ઓફ હોવાથી પોલીસને શંકા છે કે તેમની પાછળ કોઈ મોટું હેન્ડલર કામ કરી રહ્યું છે. હાલમાં પોલીસે મહારાષ્ટ્રના મુખ્ય સપ્લાયર અને અમદાવાદમાં આ માલ કોણ મેળવવાનું હતું (રિસીવર) તેની શોધખોળ તેજ કરી છે.
અમદાવાદ પોલીસ દ્વારા એનડીપીએસ (NDPS) એક્ટ હેઠળ ગુનો નોંધી આ આંતરરાજ્ય નેટવર્કને જડમૂળથી ઉખેડી નાખવા માટે ચક્રો ગતિમાન કરવામાં આવ્યા છે. ડ્રગ્સ વિરુદ્ધની આ લડાઈમાં ક્રાઈમ બ્રાન્ચની આ એક મોટી જીત માનવામાં આવે છે.