નવસારી :દક્ષિણ ગુજરાતના નવસારી જિલ્લામાં ભારતીય જનતા પાર્ટીના શિસ્તબદ્ધ ગઢમાં મોટું ગાબડું પડ્યું છે. જલાલપોર તાલુકામાં સંગઠન સ્તરે ચાલી રહેલો લાંબા સમયનો ઉકળતો ચરુ હવે બહાર આવ્યો છે. એકસાથે ત્રણ મુખ્ય હોદ્દેદારોએ રાજીનામા ધરી દેતા સ્થાનિક રાજકારણમાં ધરતીકંપ જેવી સ્થિતિ સર્જાઈ છે. ખાસ કરીને તાલુકા પ્રમુખ જેવા જવાબદાર હોદ્દા પરથી હિતેશ પટેલે છેડો ફાડતા પક્ષની આંતરિક ખેંચતાણ છતી થઈ ગઈ છે.
એકસાથે ૩ રાજીનામા: સંગઠનનું માળખું જોખમમાં
જલાલપોર તાલુકા ભાજપ પ્રમુખ હિતેશ પટેલની સાથે SC મોરચાના મહામંત્રી રાજેશ રાઠોડ અને કોષાધ્યક્ષ રણજીત વાંસિયાએ પણ પોતાના પદ પરથી રાજીનામા આપી દીધા છે. એક જ દિવસે પડેલા આ ત્રણ રાજીનામાએ જિલ્લા ભાજપ હાઈકમાન્ડની ઉંઘ ઉડાડી દીધી છે. કાર્યકરોમાં વ્યાપેલી નારાજગી જોતા એવી ભીતિ સેવાઈ રહી છે કે જો સમયસર આ મામલે પગલાં નહીં લેવાય તો આગામી દિવસોમાં રાજીનામાનો આ દોર વધુ લાંબો ચાલી શકે છે.
અરવિંદ પટેલ મેદાને: "ઘરની વાત ઘરમાં રહેશે"
જ્યારે ભાજપનું સંગઠન વિખેરાઈ રહ્યું હોય તેવું ચિત્ર ઉપસ્યું ત્યારે પ્રદેશ ઉપાધ્યક્ષ અરવિંદ પટેલ ડેમેજ કંટ્રોલ માટે મેદાને આવ્યા છે. તેમણે આંતરિક અસંતોષની વાત સ્વીકારતા પણ પરિસ્થિતિને હળવી બનાવવાનો પ્રયાસ કર્યો હતો. તેમણે આત્મવિશ્વાસ સાથે જણાવ્યું કે, "આ અમારા પરિવારનો મામલો છે. કાર્યકરોની નારાજગી હશે તો તેમની સાથે રૂબરૂ ચર્ચા કરીને ઉકેલ લાવી દેવામાં આવશે." જોકે, "અમારા ઘરની વાત છે" તેવા નિવેદન છતાં રાજકીય આલમમાં એવી ચર્ચા છે કે મામલો એટલો સરળ નથી જેટલો દેખાઈ રહ્યો છે.
અસંતોષ પાછળનું કારણ શું?
છેલ્લા ઘણા સમયથી સ્થાનિક નેતાગીરી અને કાર્યકરો વચ્ચે સંકલનનો અભાવ હોવાની ફરિયાદો ઉઠી રહી હતી. શિસ્તબદ્ધ ગણાતી પાર્ટીમાં જ્યારે તાલુકા પ્રમુખ કક્ષાના નેતા રાજીનામું આપે, ત્યારે તે ગંભીર બાબત ગણાય છે. હવે જોવાનું એ રહેશે કે પ્રદેશ નેતાગીરી આ નારાજ નેતાઓને મનાવવામાં સફળ રહે છે કે પછી જલાલપોરનું આ ગાબડું ભાજપ માટે આગામી સમયમાં માથાનો દુખાવો બનશે.