ભરૂચ જિલ્લાના વાગરા તાલુકામાં આવેલા એક્રોસ બાદલપુર ખાડી પરનો જૂનો બ્રિજ અત્યંત જર્જરિત થઈ ગયો છે અને તેના લોખંડના ટેકા ખસી ગયા હોવાથી બ્રિજ ધસી પડવાનો ગંભીર ભય સર્જાયો છે. આ બ્રિજ ચાચવેલથી મુલેર, રોઝાટંકારીયા, દહેજ જેવા વિસ્તારોને જોડે છે અને તેના ઉપરથી દિવસ-રાત ભારે અને ઓવરલોડેડ વાહનો પસાર થતાં સ્થાનિક હજારો ગ્રામજનોમાં ભયનું વાતાવરણ છે. 

સ્થળની તપાસમાં જાણવા મળ્યું છે કે બ્રિજની નીચે ટેકવેલા લોખંડના ટેકા ખસી ગયા છે, બ્રિજના પીલરો અને ડેકના પોપડા ખરી રહ્યા છે, લોખંડના સળિયા કટાઈને ડોકિયા થઈ ગયા છે અને બ્રિજ પરથી ભારે વાહનો પસાર થતાં બ્રિજ જમ્પિંગ કરતો જોવા મળે છે. તંત્ર દ્વારા બ્રિજ પર 20 મેટ્રિક ટનથી વધુ વજનના વાહનો માટે પ્રતિબંધનું બોર્ડ લગાવવામાં આવ્યું છે, પરંતુ કોઈ જાહેરનામું પ્રસિદ્ધ કરવામાં આવ્યું નથી અને પોલીસ દ્વારા તેનું કડક પાલન કરાવવામાં આવતું નથી. આ કારણે રોજિંદા હજારો ટન ઓવરલોડેડ ભારે વાહનો આ જર્જરિત બ્રિજ પરથી પસાર થઈ રહ્યા છે.

આ જર્જરિત બ્રિજની બાજુમાં જ સમાંતરે નવા બ્રિજનું નિર્માણ કાર્ય માર્ગ અને મકાન વિભાગ દ્વારા રાધે એસોસિએટ કંપનીને સોંપવામાં આવ્યું હતું. આ કામનું કોન્ટ્રાક્ટ 7 કરોડ 49 લાખ 48 હજાર 613.24 રૂપિયાનું હતું અને તેની શરૂઆત તા. 7 ડિસેમ્બર 2023થી થઈ હતી. કામ તા. 8 ડિસેમ્બર 2024 સુધીમાં પૂર્ણ કરવાનું હતું, પરંતુ આજે એટલે કે 14 મહિના પછી પણ નવા બ્રિજની કામગીરી 50% પણ પૂર્ણ થઈ નથી. કોન્ટ્રાક્ટર દ્વારા ગોકુળગતિએ કામ કરવામાં આવી રહ્યું હોવાનો આક્ષેપ સ્થાનિક લોકો તરફથી કરવામાં આવી રહ્યો છે.

આ સ્થિતિને કારણે સ્થાનિક ગ્રામજનો અને વાહનચાલકોમાં ભારે આક્રોશ છે. તેઓનું કહેવું છે કે જો જર્જરિત બ્રિજ ગમે ત્યારે ધસી પડશે તો ચાચવેલ, મુલેર, રોઝાટંકારીયા, દહેજ સહિતના વિસ્તારોના હજારો લોકો અને ઉદ્યોગો સંપર્ક-વિહોણા થઈ જશે. આ ઘટના ગીરનારના બ્રિજ જેવી દુઘટનાનું પુનરાવર્તન બની શકે તેવી શક્યતા વ્યક્ત કરવામાં આવી રહી છે.

આ મુદ્દે ભરૂચ જિલ્લા વહીવટી તંત્ર અને માર્ગ-મકાન વિભાગ પાસેથી તાત્કાલિક કાર્યવાહીની અપેક્ષા વ્યક્ત કરવામાં આવી રહી છે, જેથી કોઈ મોટી દુઘટના ન બને અને હજારો લોકોના જીવન-જીવિકાને બચાવી શકાય.