અમદાવાદ :નવનિર્મિત વાવ-થરાદ જિલ્લામાં 77મા પ્રજાસત્તાક પર્વની રાજ્ય કક્ષાની ભવ્ય અને ઐતિહાસિક ઉજવણી બાદ થરાદમાં કર્મવીરોનું અભિવાદન સમારોહ યોજાયો હતો. આ કાર્યક્રમના અધ્યક્ષસ્થાને ગુજરાત વિધાનસભાના અધ્યક્ષ શંકરભાઈ ચૌધરી ઉપસ્થિત રહ્યા હતા. આ સમારોહમાં પ્રજાસત્તાક પર્વને અપ્રતિમ સફળતા અપાવનાર અધિકારીઓ, કર્મચારીઓ અને કર્મયોગીઓનું સન્માન કરવામાં આવ્યું હતું.

વિધાનસભા અધ્યક્ષ શંકરભાઈ ચૌધરીએ પોતાના સંબોધનમાં જણાવ્યું કે, વડાપ્રધાન નરેન્દ્રભાઈ મોદીના માર્ગદર્શન હેઠળ સરહદી વિસ્તારમાં આટલા ભવ્ય પાયે રાષ્ટ્રીય પર્વની ઉજવણી શક્ય બની છે. સમગ્ર વાવ-થરાદ પંથકમાં રાષ્ટ્રીયતાનો અનેરો ઉત્સાહ જોવા મળ્યો હતો. જનતા અને વહીવટી તંત્રના અદ્ભુત સંકલનથી આયોજન સફળ રહ્યું. તેમણે કહ્યું કે, તમામ વિભાગોએ જનતા સાથે મળીને જે સુંદર સુરક્ષા વ્યવસ્થા અને સંકલન જાળવ્યું તે કાબિલેદાદ છે. ખાસ કરીને મહિલાઓની વિશેષ સહભાગીતા અને શસ્ત્ર પ્રદર્શન અનોખું રહ્યું હતું.

અધ્યક્ષે વધુમાં જણાવ્યું કે, વાવ-થરાદના નાગરિકોએ માત્ર સરકારી ઇમારતો જ નહીં, પરંતુ પોતાની ખાનગી ઇમારતો અને ઘરોને પણ રોશનીથી ઝળહળાવીને રાષ્ટ્રપ્રેમ વ્યક્ત કર્યો હતો. રાત્રિના સમયે આખું થરાદ રોશનીથી ચમકતું હતું, જે રાષ્ટ્રીય ભાવનાનું જીવંત પ્રતીક બન્યું હતું. તેમણે કહ્યું કે, કર્મયોગીઓની નિષ્ઠા અને સ્મિતભર્યા સેવાભાવથી વહીવટી તંત્ર પ્રત્યે જનતાનો વિશ્વાસ વધ્યો છે. વાવ-થરાદે શ્રેષ્ઠ કાર્ય કર્યું છે અને આ જ ઉત્સાહ સાથે આગળ વધીને જિલ્લાને દેશના અગ્રિમ જિલ્લાઓમાં સ્થાન અપાવવું જોઈએ. સૌર ઉર્જા, જળ સંચય, શિક્ષણ, આરોગ્ય, રોજગાર સહિત દરેક ક્ષેત્રે જિલ્લો આગળ વધે તે માટે સૌએ સાથે મળીને કામ કરવાનું છે. તેમણે “સર્વે ભવન્તુ સુખિનઃ...” ના ભાવ સાથે સૌને અભિનંદન પાઠવ્યા.

વાવ-થરાદ જિલ્લા કલેક્ટર જે. એસ. પ્રજાપતિએ જણાવ્યું કે, વિધાનસભા અધ્યક્ષ શંકરભાઈ ચૌધરીના માર્ગદર્શન અને વિશેષ પ્રયાસોને કારણે જ આટલા મોટા પાયે રાજ્ય કક્ષાનું આયોજન શક્ય બન્યું. હજારોની સંખ્યામાં જનમેદની ઉમટી પડી હતી, જે વહીવટી તંત્રની સફળતાનું પ્રમાણ છે. તેમણે કહ્યું કે, દરેક સ્તરના કર્મયોગીઓએ અત્યંત નિષ્ઠાથી ફરજ નિભાવી છે. ટેક્નિકલ ટીમ અને પાયાના કર્મચારીઓના પરિશ્રમથી જ આયોજન સુવ્યવસ્થિત રહ્યું. આ સફળતાએ થરાદ પંથકની જનતામાં વહીવટી તંત્ર પ્રત્યે અતૂટ વિશ્વાસ જગાડ્યો છે. આગામી સમયમાં પણ આ જ ઉત્સાહ સાથે જિલ્લાના વિકાસ માટે કાર્યરત રહેવાનું તેમણે આહ્વાન કર્યું હતું.

આ અવસરે વાવ-થરાદ જિલ્લા પોલીસ વડા ચિંતન તેરૈયાએ સ્વાગત પ્રવચન કર્યું હતું. સમારોહમાં તમામ કર્મયોગીઓને તેમની પ્રશંસનીય કામગીરી બદલ અભિનંદન પાઠવી પ્રોત્સાહિત કરવામાં આવ્યા હતા. આ કાર્યક્રમ વાવ-થરાદ જિલ્લાના નવા નિર્માણ અને વિકાસની દિશામાં એક મહત્વપૂર્ણ પગલું સાબિત થયો છે. જનતા અને વહીવટી તંત્રના સંકલનથી સર્જાયેલો આ ઉત્સાહ ભવિષ્યમાં પણ જિલ્લાને આગળ લઈ જશે.