રાજકોટ:ગુજરાતમાં રેલવે નેટવર્કને વધુ આધુનિક બનાવવાના ભાગરૂપે અમદાવાદ-વિરમગામ સેક્શન પર ઓટોમેટેડ સિગ્નલિંગ પ્રણાલીનું કામ હાથ ધરવામાં આવનાર છે. આ ટેકનિકલ અપગ્રેડેશનને કારણે પશ્ચિમ રેલવે દ્વારા સાબરમતીના વિવિધ કેબિન વિસ્તારોમાં મોટો ટ્રાફિક બ્લોક લેવામાં આવ્યો છે. આ બ્લોકની સીધી અસર રાજકોટ ડિવિઝનમાંથી પસાર થતી અનેક ટ્રેનો પર પડશે, જેને કારણે આગામી દિવસોમાં મુસાફરોએ ભારે હાલાકીનો સામનો કરવો પડી શકે છે. રેલવે વહીવટી તંત્રએ મુસાફરોને વિનંતી કરી છે કે તેઓ સ્ટેશન પર પહોંચતા પહેલા પોતાની ટ્રેનનું સ્ટેટસ ચોક્કસ ચકાસી લે.

આ ફેરફારોમાં સૌથી મોટી અસર જામનગર-વડોદરા ઇન્ટરસિટી એક્સપ્રેસ પર જોવા મળશે. ટ્રેન નંબર 22960 (જામનગર-વડોદરા) આગામી 27 અને 28 જાન્યુઆરીએ સંપૂર્ણપણે રદ કરવામાં આવી છે, જ્યારે વડોદરા-જામનગર ઇન્ટરસિટી (22959) પણ 26 અને 27 જાન્યુઆરીના રોજ ટ્રેક પર દોડશે નહીં. આ ઉપરાંત, સૌરાષ્ટ્રની પ્રીમિયમ ટ્રેન ગણાતી ઓખા-અમદાવાદ વંદે ભારત એક્સપ્રેસના રૂટમાં પણ 27 જાન્યુઆરીએ ફેરફાર કરાયો છે. આ ટ્રેન તેના નિર્ધારિત રૂટને બદલે ડાયવર્ટ કરેલા રૂટ કટોસન રોડ-કલોલ થઈને દોડશે અને સાબરમતી જંકશનને બદલે સાબરમતી (બીજી) સ્ટેશન પર ઊભી રહેશે.

બીજી તરફ, સૌરાષ્ટ્રના આંતરિક રેલવે વ્યવહારમાં પણ મહત્વના ફેરફારો કરવામાં આવ્યા છે. કાનાલુસ સ્ટેશન પર નવા ફૂટ ઓવરબ્રિજ અને પ્લેટફોર્મના નિર્માણ કાર્યને કારણે કાનાલુસ-પોરબંદર લોકલ ટ્રેનો પર એક મહિના સુધી અસર રહેશે. 26 જાન્યુઆરીથી શરૂ કરીને 28 ફેબ્રુઆરી સુધી પોરબંદર-કાનાલુસ લોકલ ટ્રેન માત્ર ગોપજામ સુધી જ દોડશે. એટલે કે, કાનાલુસ અને ગોપજામ વચ્ચેનો રેલવે વ્યવહાર આ સમયગાળા દરમિયાન આંશિક રીતે બંધ રહેશે, જેના કારણે સ્થાનિક મુસાફરોને અન્ય પરિવહન સાધનો પર આધાર રાખવો પડશે.

રેલવે વિભાગના પ્રવક્તાએ જણાવ્યું હતું કે, સુરક્ષા અને આધુનિકીકરણના આ કામો લાંબા ગાળે મુસાફરોની સુવિધામાં વધારો કરશે અને ટ્રેનોની ઝડપ વધારવામાં મદદરૂપ થશે. જોકે, કામકાજ દરમિયાન સાણંદ અને સાબરમતી જંકશન જેવા મહત્વના સ્ટોપેજ પર ટ્રેનો ઉપલબ્ધ નહીં રહેતા મુસાફરોએ વૈકલ્પિક આયોજન કરવું પડશે. પશ્ચિમ રેલવે દ્વારા તમામ અસરગ્રસ્ત ટ્રેનોની યાદી જાહેર કરવામાં આવી છે અને મુસાફરોને પૂછપરછ બારી અથવા રેલવેની સત્તાવાર વેબસાઈટનો ઉપયોગ કરીને અપડેટ મેળવવા સૂચના આપવામાં આવી છે.