અમદાવાદ: અમદાવાદના એરપોર્ટ વિસ્તારમાં આવેલી એક હોટલમાં એક હચમચાવી દેતી ઘટના સામે આવી છે. પ્રેમ પ્રકરણમાં ઘરેથી ભાગી ગયેલા પ્રેમી યુગલે હોટલના રૂમમાં એકબીજાના હાથની નસ કાપીને આત્મહત્યાનો પ્રયાસ કર્યો હતો. આ કરુણ ઘટનામાં યુવકનું ઘટનાસ્થળે જ મોત નીપજ્યું છે, જ્યારે યુવતી ગંભીર હાલતમાં હોસ્પિટલમાં જીવન-મરણ વચ્ચે ઝોલાં ખાઈ રહી છે.
    પોલીસ સૂત્રો પાસેથી મળતી માહિતી મુજબ, અમદાવાદના એરપોર્ટ વિસ્તારમાં આવેલી ડેઈલી સ્ટે નામની હોટલમાં આ બનાવ બન્યો હતો. શેલા વિસ્તારમાં રહેતા ૨૩ થી ૨૪ વર્ષીય યુવક અને યુવતી ગઈકાલે પોતાના ઘરેથી ભાગી ગયા હતા. ત્યારબાદ તેઓ આ હોટલમાં રોકાવા માટે આવ્યા હતા. બપોરે ૨ થી ૨:૩૦ વાગ્યાના અરસામાં બંનેએ રૂમમાં જઈને એકબીજાના હાથની નસ કાપી નાખી હતી.
    લોહીલુહાણ હાલતમાં મળી આવેલા બંનેને જોઈને હોટલના સ્ટાફે તાત્કાલિક પોલીસને જાણ કરી હતી. જોકે, ગંભીર રીતે ઈજાગ્રસ્ત થયેલા યુવકનું હોટલમાં જ મૃત્યુ થયું હતું. જ્યારે યુવતીને ગંભીર હાલતમાં સારવાર માટે હોસ્પિટલમાં ખસેડવામાં આવી છે. હાલ યુવતી બેભાન અવસ્થામાં છે અને તેની સ્થિતિ નાજુક હોવાનું જાણવા મળ્યું છે.
  એરપોર્ટ પોલીસ સ્ટેશનના પીઆઈના જણાવ્યા અનુસાર, મૃતક યુવક અને ઈજાગ્રસ્ત યુવતીના નામ બદલવામાં આવ્યા છે, પ્રાથમિક તપાસમાં બંનેના નામ રઘુ  અને સોનલ  હોવાનું સામે આવ્યું છે. બંને શેલાના રહેવાસી હતા. પોલીસે આ મામલે ગુનો નોંધીને બંનેના પરિવારજનોનો સંપર્ક કરવાની તજવીજ હાથ ધરી છે.
 પ્રાથમિક દ્રષ્ટિએ આ પ્રેમ પ્રકરણ હોવાની આશંકા સેવાઈ રહી છે