વડોદરા જિલ્લાના પાદરા-જંબુસર રોડ પર બાઈક અને ટ્રક વચ્ચ અકસ્માતનો એક બનાવ સામે આવ્યો છે. જેમાં બાઈક ચાલક યુવકનું મોત નીપજ્યું છે.

આ અંગે પ્રાપ્ત વિગતો પ્રમાણે, ડબકા ગામમાં રહેતો જયેન્દ્રસિંહ પરમાર બાઈક લઈને પાદરા-જંબુસર રોડ ઉપરથી પસાર થઈ રહ્યો હતો. જયેન્દ્રનું બાઈક વિશ્રામપુરા ગામ નજીકથી પસાર થઈ રહ્યું હતુ, ત્યારે સીતારામ હોટલ પાસે તેનું બાઈક આગળ જતી ટ્રકમાં ધડાકા સાથે ઘુસી ગયું હતુ.

આ અકસ્માત બાદ આસપાસના લોકો ઘટના સ્થળે એકઠા થઈ ગયા હતા અને પોલીસને જાણ કરવામાં આવી હતી. આ બાબતની જાણ થતાં પાદરા પોલીસનો કાફલો તાત્કાલિક ઘટના સ્થળે દોડી આવ્યો હતો. જો કે જયેન્દ્રસિંહનું ઘટના સ્થળે જ કમકમાટીભર્યું મોત નીપજ્યું હતુ.

હાલ તો જયેન્દ્રસિંહના મૃતદેહને પોસ્ટમોર્ટમ અર્થે વડુ સરકારી હોસ્પિટલ ખસેડવામાં આવ્યો છે. તેમજ પોલીસે અકસ્માતે મોતનો ગુનો દાખલ કરીને આગળની કાયદેસરની કાર્યવાહી હાથ ધરી છે