અંકલેશ્વર (ભરૂચ): ભરૂચ અને અંકલેશ્વર વચ્ચે આજે રવિવારની સવારે ફૂલ ગુલાબી ઠંડી વચ્ચે રેવા મેરેથોન 3.0નું ભવ્ય આયોજન કરવામાં આવ્યું હતું. ભરૂચના રેવા સોશ્યલ એન્ડ સ્પોર્ટ્સ ચેરીટેબલ ટ્રસ્ટ, અંકલેશ્વર દ્વારા વિવિધ સંસ્થાઓના સહયોગથી 'રન ફોર નર્મદા મૈયા'ના ઉદ્દેશ સાથે તેમજ લોકોમાં સ્વાસ્થ્ય જાગૃતિ અને પર્યાવરણ પ્રત્યેનો પ્રેમ વધે તેવા ઉમદા હેતુથી આ મેરેથોન યોજાઈ હતી. આ પ્રસંગે રાજ્યકક્ષાના મંત્રી ઈશ્વરસિંહ પટેલના હસ્તે મેરેથોનનો પ્રારંભ કરાવવામાં આવ્યો હતો, જેમાં ભરૂચના ધારાસભ્ય રમેશ મિસ્ત્રી સહિતના અનેક રાજકીય અને સામાજિક આગેવાનો ઉપસ્થિત રહ્યા હતા.
આ મેરેથોનનો પ્રારંભ ભરૂચ-અંકલેશ્વર વચ્ચે આવેલા અક્ષર આઇકોન ખાતેથી કરવામાં આવ્યો હતો. આ સ્પર્ધામાં 4,000થી વધુ દોડવીરોએ ઉત્સાહભેર ભાગ લીધો હતો, જે આયોજનની સફળતા દર્શાવે છે. મેરેથોનનું આયોજન 3 કિલોમીટર, 5 કિલોમીટર, 16 કિલોમીટર અને 21 કિલોમીટરની એમ વિવિધ કેટેગરીમાં કરવામાં આવ્યું હતું, જેથી દરેક ઉંમરના અને સ્તરના દોડવીરો ભાગ લઈ શકે. ઠંડા અને ખુશનુમા વાતાવરણમાં દોડવીરોએ જોશભેર ભાગ લીધો હતો.
આયોજક મહંમદ જારડીવાલા અને નરેશ પુજારા સહિતની ટીમ દ્વારા આયોજિત આ મેરેથોન હવે માત્ર એક રમતગમતનો કાર્યક્રમ ન રહેતાં, ભરૂચ-અંકલેશ્વર વિસ્તારમાં સામુદાયિક સ્વાસ્થ્ય અને પર્યાવરણ સંરક્ષણની ભાવનાને પ્રોત્સાહન આપતું મોટું પ્લેટફોર્મ બની ગયું છે. આ વિશાળ સંખ્યામાં દોડવીરોની ભાગીદારી બતાવે છે કે લોકો હવે ફિટનેસ અને પર્યાવરણ પ્રત્યે વધુ સભાન બન્યા છે.