અમદાવાદ તા. ૬: ગુજરાતમાં ‘માનવ અધિકારોનું' મોટાપાયે ઉલ્લંઘન અને સત્તાના દુરઉપયોગમાં રાચતી ભાજપ સરકારમાં  કસ્‍ટોડીયલ ડેથ અંગે ગૃહ વિભાગ પર આકરા આક્ષેપ કરતા ગુજરાત પ્રદેશ કોંગ્રેસ સમિતિના મીડીયા કન્‍વીનર અને પ્રવક્‍તા ડો. મનિષ દોશીએ જણાવ્‍યું હતું કે ગાંધી- સરદારના ગુજરાતમાં સતત વધી રહેલા કસ્‍ટોડીયલ ડેથના કિસ્‍સાઓ એ ગુજરાત માટે ચિંતાનો વિષય છે. તાજેતરમાં સુરેન્‍દ્રનગર ખાતે એક કસ્‍ટોડીયલ ડેથની ઘટના પણ તપાસ માંગી લે છે. છેલ્લાં છ વર્ષમાં પોલીસ કસ્‍ટડીમાં ૯૫ આરોપીનાં કસ્‍ટોડીયલ ડેથ સાથે ગુજરાત દેશમાં ટોચના ક્રમાંકે છે. નેશનલ હ્યુમન રાઈટ્‍સ કમિશન (એનએચઆરસી)ના રિપોર્ટમાં કસ્‍ટોડીયલ ડેથના આંકડાઓએ ભાજપ સરકારના ગળહ વિભાગેની સબ સલામતની પોલ ખોલી નાખી છે.

ગુજરાતમાં વર્ષ ૨૦૧૭-૧૮માં ૧૪, વર્ષ ૨૦૧૮-૧૯માં ૧૩, વર્ષ ૨૦૧૯-૨૦માં ૧૨, વર્ષ ૨૦૨૧-૨૨માં ૨૪ અને વર્ષ ૨૦૨૨-૨૩ માં ૧૫ કસ્‍ટોડીયલ ડેથની ઘટના બની છે, કોરોનાકાળના વર્ષ ૨૦૧૯-૨૦માં કસ્‍ટોડીયલ ડેથની ઘટનાઓની તુલનામાં વર્ષ ૨૦૨૧-૨૨માં ૨૪ ઘટના સાથે કસ્‍ટોડીયલ ડેથના કિસ્‍સાઓમાં બમણો વધારો થયો હતો. સમગ્ર દેશમાં ૨૦૧૭ થી ૨૦૨૩ સુધીના છ વર્ષમાં પોલીસ કસ્‍ટડીમાં લગભગ ૭૦૦ થી વધુ લોકોના મોત થયા છે. પોલીસ ટોર્ચર, સમયસર મેડીકલ ટ્રીટમેન્‍ટ ન મળે સહિતના કારણોને કારણે આરોપીઓનાં મોત થયા છે. ગુજરાતમાં સતત ‘માનવ અધિકારોનું' મોટાપાયે ઉલ્લંઘન થઇ રહ્યું છે. આ પરિસ્‍થિતિ પોલીસ કસ્‍ટડીમાં રહેલા લોકોની સલામતિ અંગે ગંભીર ચિંતાઓ ઉભી કરે છે.

કોંગ્રેસ પક્ષની માંગ સ્‍પષ્ટ છે કે,  ૧.     દરેક કસ્‍ટોડિયલ ડેથની સ્‍વતંત્ર ન્‍યાયિક તપાસ કરવામાં આવે. ૨. ગરીબ, પછાત, અનુસૂચિત જાતિ, અનુસૂચિત જનજાતિ અને બક્ષીપંચ સમાજના શંકાસ્‍પદ મોત પર ફાસ્‍ટ-ટ્રેક કોર્ટ. ૩. પોલીસ રિફોર્મ્‍સ, ૨૦ વર્ષથી સરકાર શા માટે અટકાવી રહી છે? ૪. જવાબદાર અધિકારીઓ પર કડક ફોજદારી કાર્યવાહી કરવામાં આવે. વગેરેનો સમાવેશ થાય છે.