સુરતઃ દક્ષિણ ગુજરાત વીજ કંપની દ્વારા સુરત શહેરમાં સ્માર્ટ મીટર ફરજિયાત લગાવવાની કાર્યવાહીને લઈને મોટો વિવાદ ઊભો થયો છે. આ મામલે આમ આદમી પાર્ટીએ વિરોધ નોંધાવીને તાત્કાલિક સ્માર્ટ મીટર હટાવવાની માગ સાથે જિલ્લા કલેક્ટરને આવેદનપત્ર સુપરત કર્યું છે.

આ વિવાદનું મૂળ DGVCL દ્વારા સોસાયટીઓમાં આપવામાં આવેલી નોટિસ છે. આ નોટિસમાં સ્પષ્ટપણે ઉલ્લેખ કરવામાં આવ્યો છે કે, વીજ ગ્રાહકોએ ફરજિયાતપણે સ્માર્ટ મીટર લગાવવું પડશે. એટલું જ નહીં, જે લોકો આ સ્માર્ટ મીટર લગાવવાનો ઇનકાર કરશે, તેમનું વીજ કનેક્શન કાપી નાંખવામાં આવશે તેવી ચેતવણી પણ નોટિસમાં આપવામાં આવી છે.

આમ આદમી પાર્ટીનો આક્ષેપ છે કે, ગુજરાતના ઉર્જા વિભાગ તરફથી આ પ્રકારે મીટર ફરજિયાત કરવા અંગેનો કોઈ સત્તાવાર પરિપત્ર જાહેર થયો નથી. તેમ છતાં કંપની દ્વારા આ પ્રકારે ધમકીભરી નોટિસ આપીને લોકોને સ્માર્ટ મીટર લગાવવા માટે મજબૂર કરવામાં આવી રહ્યા છે.